Владината одлука за отворање на границите и аеродромите за влез во земјата без задолжителни ПЦР тестови и карантин не е по препорака на Комисијата за заразни болести, објави порталот sdk.mk. Нејзините членови изразуваат изненадување за кревање на државните рамки во петок (26 јуни) и за ставање во функција на аеродромите во среда (1 јули). Од Комисијата за заразни болести велат дека не дале препорака ниту за отворање на теретаните, ниту пак за прием на гости во внатрешноста на кафулињата и рестораните што се сметаат како едни од најризичните места за трансмисија на вирусот.
Од Комисијата за заразни болести, како што пренесува sdk.mk, допрва планирале да разговараат за отворање на границите и воопшто не го предложиле петок. На прашањето дали Комисијата го предложија 26 јуни како ден за отворање на границите, нејзиниот претседател Жарко Караџовски упатува на одговор кај премиерот.
Ниту работата на трговските центри и молови, теретаните и внатрешноста на угостителските објекти биле тема на дискусија во Комисијата за заразни болести. Од таму истакнуваат дека Протоколи се донесени, но не е препорачан датум за нивно отворање што го образложуваат со бројките на епидемиолошката статистика.
Вицепремиерот во Владата, Бујар Османи вчера преку Фејсбук порача дека е време за отворање на границите и на аеродромите. Денеска премиерот Спасовски истакна дека одлуката не е политичка и не треба да се поврзува со изборите, туку е донесена, како што рече, врз основа на анализи и препораки на Комисијата за заразни болести.
Нискобуџетната авиокомпанија „Визер“ претходно соопшто дека ги суспендира сите летови од и кон Македонија со 13 јули.