Премиерот на Италија, Џузепе Конте изјави дека шест европски земји изразиле подготвеност за преземање на 147. мигранти кои се блокирани на шпански хуманитарен брод во водите на Италија.
Тој ова го напиша во отвореното писмо до министерот за внатрешни работи, Матео Салвини, објавено на својот Фејсбук, во кое се наведува дека Франција, Германија, Романија, Португалија, Шпанија и Луксембург ќе „подадат рака“.
Шпанскиот хуманитарен брод „Опен армс“ (Open Arms) со 147 мигранти денеска се вкотви во италијански територијални води и чека дозвола да вплови во пристаниште на островот Лампедуза, откако Административниот суд во Рим вчера го дозволи тоа.
Италијанскиот министер за внатрешни работи, Матео Салвини забрани бродот да влезе во пристаништето, додека министерката за одбрана Елизабета Трента одби да ја потпише забраната на Салвини. Трента истакна дека политиката не може да ја загуби хуманоста.
Административниот суд во Рим вчера даде зелено светло за бродот на шпанска хуманитарна организација „Опен армс“ да вплови во италијанските води. Судот ја усвои жалбата на таа организација на забраната бродот да се закотви во Италија што ја донесе Салвини.
Поради забраната на Салвини, бродот на шпанската организација чекаше две недели за дозвола за закотвување на италијанскиот брег.
Во овој период, според организацијата Опен армс, на некои мигранти на бродот им се влошило здравјето.
Италијанскиот суд во образложението на пресудата посочил дека е изречена поради исклучително тешката и итна состојба на мигрантите на бродот.