Контроверзниот бизнисмен со иранско-турско потекло, а кој поседува и македонски пасош, Реза Зараб, во сведоштво пред американскиот суд рекол дека го подмитил поранешниот министер за економија на Турција, Зафер Чаглајан како дел од милионска трговска шема преку која ги заобиколил санкциите врз Иран наметнати од САД.

Зараб, чие име се поврзува со Македонија, во јавноста излезе минатата година. Според американските обвинители, тој поседува четири пасоши: ирански, азербејџански, турски и македонски. Како и зошто го добил македонскиот пасош, и дали извлекувал пари од Македонија се уште не се знае и е предмет на повеќето истраги на американските истражни органи.

Во судското рочиште кое се следи будно во Турција и во САД, Зараб рекол дека му платил на Чаглајан околу 45 до 50 милиони евра мито помеѓу 2012 и 2013 година со цел да му помогне во трговската размена на нафта за злато и да ги заобиколи санкциите.

Зараб во моментов е главен сведок на обвинителите.

Во случајот обвинети се и поранешните заменици генерални директори на Халкбанк, Хакан Атила и Сулејман Аслан, екс министерот Чаглајан како и уште неколку лица кои се во Турција и се на слобода.

Според американските обвинители, шемата овозможила стотици милиони евра од нафтени приходи да се движат низ меѓународниот банкарски систем, заобиколувајќи ги американските санкции.

Овие вести не се добри ниту за турскиот претседател Реџеп Тајип Ердоган, кој во тоа време беше премиер на Турција, ако се докаже дека неговата влада го покривала злосторничкото здружување.

Но и Ердоган и неговите соработници тврдат дека судењето е заговор на неговиот најголем противник, Турчинот Фетулах Ѓулен, кого турската влада го обвинува за обидот за државен удар минатата година.

Потсетувајќи на ставот на владата, турскиот заменик-премиер Бекир Боздаг неодамна за агенцијата Анадолу изјави дека „Зараб станал клеветник под притисок“.

Во своето сведоштво пред американскиот суд, Зараб рекол дека најпрво, во 2011 година, стапил во контакт со поранешниот  заменик-генерален директор на Халкбанк, Сулејман Аслан за да ги покрие транскациите и да ја води операцијата, но бил одбиен.

По ова, според неговото сведоштво, тој стапил во контакт со Чаглајан, по што и лично се сретнале.

„Имавме тет-а-тет средба со Чаглајан. Тој побара детали за трговската размена. Праша за профитот и потоа рече дека може да го поделиме по пола“, рекол Зараб.

Потоа во шемата влегол и Хакан Атила кој ги покрил транскациите со Иран.

Зараб беше уапсен во март 2016 година во Мајами.