Втор пораз на МЗТ Скопје во кошаркарскиот Еврокуп на ФИБА. Цедевита славеше на македонскиот првак со 89:85 за прв триумф на хрватскиот претставник во групата А, но и втор над „штрковите“ во оваа сезона по убедливиот во Загреб во АБА лигата.
Составот предводен од Александар Јончевски го загуби мечот во, буквално, финишот на последната четвртина. Првиот период заврши без предност (26:26) за домашните подоцна да заминат со залиха од шест поени на одмор. Тоа, секако, добиваше на значење поради отсуствата на Симоновски, Клоф и Дреновац и влеваше надеж дека победа е возможна мисија.
Израмнета битка донесе и продолжението. Ниту една од екипите не „натежна“ осетно во десетте минути што следуваа по враќање од соблекувална. Загрепчани, незначително, за пола кош, успеаја да ја добијат третата четвртина меѓутоа „сино-белите“ и натаму имаа плус пет што на крајот, сепак, се покажаа недоволни за победа.
Цедевита подобро влезе во последниот период од средбата. Наметна ритам што „металците“ тешко го следеа. Гостите набрзија го анулираа заостанувањето за што придонесоа и неколкуте грешки и нереализирани напади на домашните и кон финишот се упатија со седум поени разлика на две ипол минути до крајот. МЗТ Скопје одговори со серија од 5:0 за доближување на, најпрво, 83:85, а потоа и 85:87 на 44 секунди до звукот на сирената.
Последниот напад го имаа гостите. На двапати одговорност да стави печат на победата на Цедевита презеде Џексон. Првиот пат беше непрецизен, но Мекиќ во обид да истрча контра ја нагази линија, па составот на Вељко Мршиќ остана во напад. Во него, повторно Американецот со закана, овојпат да влезе и положи пришто налета на „рампа“ од Скот.
Сликата на теренот остана непроменета како и тежиштето на половината на „штрковите“. И третиот бран за реализација одеше преку Џексон кој шутираше за три, топката се одби од обрачот, а домашните беа „гледачи“ во сопствениот рекет. Среќно стигна до Крушлин кој ја дистрибуира повторно до Џексон со таа разлика што сега тој изнуди прекршок за два „пенала“. Ги погоди двата за недостижни четири разлика (85:89) што останаа непроменети во преостанатите 7 секунди.
Најефикасен на средбата беше токму Џексон со 29 поени, Крушлин постигна 14, Арапови 13. Британецот Кларк со 23 коша, Темс со 18 и Скот со 15 го предводеа македонскиот првак.
Еврокуп
Група А, 3. коло
МЗТ Скопје – Цедевита 85:89 (26:26, 20:14, 21:22, 18:27)
СЦ „Јане Сандански“ во Скопје. Гледачи: 700. Судии: Фуфис (Грција), Картал (Турција), Бауманис (Летонија).
МЗТ Скопје: Кларк 23, Цветковски 7, Темс 18, Синовец 4, Мекиќ 3, Лучиќ 5, Младеновски, Скот 15, Лалиќ 10.
Тренер: Александар Јончевски
Цедевита: Џејмс 4, Крушлин 14, Катиќ 6, Бабиќ 4, Муса 6, Билан 8, Бегиќ 5, Араповиќ 13, Џексон 29.
Тренер: Вељко Мршиќ