Изненадувањето на вечерта во кошаркарската Евролига го приреди Басконија (до лани позната како Лаборал Куча). Екипата од Виторија ја доби шпанската пресметка со Реал и тоа во Мадрид со 91:87 за нејзин втор триумф во натпреварувањето во оваа сезона и прв пораз на „кралскиот клуб“.
Статистички гледано, двата тима беа израмнети и по бројот на загубени топки и по бројот на украдени топки, и во скоковите под обрачите, изведување на слободните фрлања. Она во што гостите, се чини, беа во блага предност се поените за два и три поени. Јака Блажич беше прв стрелец на паркетот со 21 поен, Густаво Ајон со најмногу кошеви меѓу „кралевите“ (16).
ЦСКА Москва ја забележа втората победа во Истанбул. По убедивиот триумф во првото коло над Галатасарај, актуелниот европски првак го совлада и Анадолу Ефес со 93:87. Најдобар во составот од Русија беше Нандо де Коло со 26 поени, шест асистенции и четири скока, впечаток во поразениот тим остави Дешон Томас кој уфрли 16 коша. За ЦСКА ова беше трета победа во сезоната, за Анадолу Ефес трет пораз.
Олимпијакос во Пиреја не дозволи изненадување во дуелот со Армани Милано. Гркиот тим победи со 91:81 на крилјата на Ерик Грин и Василис Спанулис кои уфрлија по 16 поени за „црвено-белите“. Уште тројца нивни соиграчи со двоцифрен ефект – Кем Бирч реализира 12 коша, Хекет и Лоџески по 10. На спротивната Симон и Радуљица беа централни фигури со 16, односно, 14 поени.
Во преостанатиот дуел од денешната програма, Дарушафака трумфира во Казан против Уникс со 94:87. Третото коло ќе се комплетира утре со дуелите Црвена звезда – Барселона, Фенербахче – Жалгирис, Бросе Бамберг – Панатинаикос и Макаби Тел Авив – Галатасарај.
Евролига, 3. коло
Резултати: Реал Мадрид – Басконија 87:91, Олимпијакос – Армани Милано 91:81, Анадолу Ефес – ЦСКА Москва 87:93, Уникс Казан – Дарушафака 87:94.