Приштина е првата станица за машката кошаркарска на Македонија во претквалификациите за Светското првенство во Кина во 2019 година. Ривал на „црвено-жолтите“ во воведните 40 минути за враќање на загубениот имиџ и рејтингот од минатото е Косово. Вечерашниот меч во „Палатата на млади и спорт“ е со почеток во 20,15 часот во рамки на групата Ц во која е уште и селекцијата на Естонија.
Играта во одбрана и „ладни глави“ се потенцираат како клучни моменти за победнички вовед во циклусот. Првиот доаѓа како заклучок од скенирањето на косовската селекција што го направи стручниот штаб, вториот од преполната сала што се очекува.
„Косово не е тим што треба да се прецени ниту, пак, да се потцени. Далеку дека се наивни. Напротив можат да создадат доста проблеми особено пред нивна публика. Едни од нивните адути се шутерите Морина и Кастрати, најдобриот играч го имаат во Бериша. Очекуваме полни трибини и притисок од сите страни. Затоа мора да останеме мирни, да не потпаднеме на евентуални провокации и да одигра добро во одбрана ако сакаме победа и успешен почеток во групата“, коментира селекторот Јорданчо Давитков.
Македонските кошаркари влегуваат во претквалификациите со шест контролни средби во подготвителниот период. Пет од нив добија и еден загубија што, според селекторот, е доволно за обврските што претстојат во оваа фаза.
„Наш стремеж е да ги повториме изданијата од контролите. Во тој случај ќе завршиме голем дел од задачите. Но, ќе повторам. Најважно е да не дозволиме да бидеме исфрлени од колосек“, додава Давитков.
Во квалификациите за СП 2019 ќе учествуваат сите членки на ФИБА Европа. Место во квалификациите ќе има за осум селекции од четирите претквалификациски групи. Групата А е единствената со четири тима (Словачка, Шведска, БиХ и Ерменија), групата Б ја сочинуваат Албанија, Австрија и Холандија, а во групата Д ќе разигруваат Португалија, Бугарија и Белорусија.
Квалификациите за завршниот турнир во Кина, според натпреварувачкиот календар, ќе почнат во ноември во оваа година и ќе продолжат во февруари, во јуни и ќе финишираат во јули во 2018 година. Светското првенство во 2019 година во Кина ќе биде првото на кое ќе учествуваат 32 репрезентации.
Распоред на натпревари на Македонија во групата Ц во претквалификациите за СП 2019
2 август: Косово – Македонија (20,15 ч.)
5 август: Македонија – Естонија (20,30 ч., сала „Борис Трајковски“)
12 август: Македонија – Косово (20,30 ч., сала „Борис Трајковски“)
16 август: Естонија – Македонија (17,30 ч.)