Се раздели со Басконија да отпочне соработка со Барселона. Сито Алонсо е наследникот на Јоргос Барцокас на клупата на кошаркарскиот гигант од „Блауграна“ кој зад себе има очајна сезона. Во шпанската АЦБ лига беше елиминиран од Валенсија во четврт-финалето од плеј-офот, а во Евролигата заврши на 11. место.

Алонсо потпиша договор со Каталонците на две години со можност за продолжување на престојот во клубот за 12 месеца во случај, се разбира, на двострано задоволство. Пред ангажманот во Басконија (поранешна ТАУ Керамика, Каха Лаборал и Лаборал Куча), тој работеше како тренер во Хувентуд и Билбао, а еден период мина и на кормилото на шпанската селекција за играчи до 20 години.

Со тимот од Виторија играше четврт-финале во Евролигата и полуфинале во националниот Куп и во домашното првенство.