Александар Ѓорѓевиќ се повлече од позицијата селектор на кошаркарската репрезентација на Србија по освоеното петто место на Светското првенство во Кина. Одлуката за кој вели дека ја донел и пред мундобаскетот ја соопшти на прес-конференцијата по триумфот над Чешка со 90:81.
„Им кажав на играчите дека заминувам. Мислам дека е ред и време. Немаше разговори за продолжување на соработката. Мое е да се повлечам наместо да чекам разговор. Како човек или тренер, знам кога треба да се направи првиот чекор. Сега чувствувам обврска за тоа. Заминувам во момент во кој не успеавме да го оствариме посакуваното на ова Светско првенство. Одлуката ја донесов пред почеток на турнирот, но не беше во ред тогаш да објавам“, порача Ѓорѓевиќ по мечот во Донгуан.
Седмото место на СП 2019 го освои репрезентацијата на САД по триумфот над Полска со 87:74. Утре (недела) од 10 часот претпладне ќе играат Франција – Австралија за бронзениот медал, а од 14 часот е закажано големото финале меѓу Шпанија и Аргентина.