Собранието на Косово со 61 глас „за“, 24 „против“ и еден „воздржан“ ја избра новата влада на чие чело ќе биде Авдулах Хоти од Демократскиот сојуз на Косово (ЛДК). Неговиот кабинет, според предлогот што го изнесе пред пратениците, ќе има четворица заменици премиери и 15 министри кои доаѓаат од новата коалиција што ја сочинуваат ЛДК, Алијансата за иднината на Косово (ААК), Социјалдемократската иницијатива (Нисма), Српската листа (СЛ) и таканаречената „Груп 6 +“, односно партиите на помалите етнички заедници.
Вицепремиери во новата косовска Влада се Бесник Тахири, Дритон Селманај, Албулена Баљај и Горан Ракиќ. Нов министер за правда е Селим Селими, за одбрана Антон Ќуни, кој и досега го водеше истиот ресор, за внатрешни работи Агим Велиу, за надворешни работи Мелиза Харадинај, за заедници и враќање Даливор Јевтиќ, а досегашната министерка за образование, Хикмете Бајрами во кабинетот на Хоти ќе ги води финансиите.
Претставувајќи ја својата програма, мандатарот Хоти нагласи дека намерата на партнерите од новата коалиција за формирање влада била единствено заштитата на човековите права и слободи и напредокот на државата. Тој рече дека прифаќањето на кандидатурата за премиер не претставувало „баш лесен предизвик“ за него.
„Чувствувам одговорност пред пратениците, пред граѓаните и пред Уставот за задачите кои нè очекуваат. Нација сме на која ѝ треба влада која ќе ѝ служи, а не обратно, влада на која ѝ треба нација за експериментирање. Појдовме единствено од општествениот интерес. Новата влада нема да има ниедна друга моќ, освен онаа што извира од Уставот“, порача Хоти.
Новата влада, рече тој, во ниеден момент нема да го напушти евроатлантскиот пат на Косово, а ќе стори сè за да ги интегрира заедниците во сите области на општествениот живот, со обезбедување еднакви можности за сите. Хоти истакна дека веднаш ќе се заложи за надминување на пречките за продолжување на дијалогот со Србија како „прашање од животно значење за Косово“, за што најави тесна соработка со Европската унија и САД за кои рече дека имаат „неделива улога“.
Двата приоритети на новата Влада, потенцира Хоти, се борбата против пандемијата на ковид-19 и економското опоравување по совладувањето на епидемијата, за што ќе се сработи посебна владина програма што ќе се заснова на анализа на последиците на ковид-19 врз економијата.
На седницата не присуствуваа пратениците на досега владејачкото Движење „Самоопределување“ на Албин Курти, освен шефот на пратеничката група Реџеп Селими, кој во своето обраќање по излагањето на Хоти рече дека формирањето нова влада претставува „грабеж“ и „газење на волјата на граѓаните изразена на изборите од октомври минатата година.
„Некои губитнички партии, некои мали и некои малку поголеми партии, се собраа за да ја украдат победата на „Самоопределување“. Владата што се обидувате да ја формирате е производ на измама. Таа е илегална бидејќи произлезе од неправедната пресуда на Уставниот суд“, изјави Селими.
Шефовите на пратеничките групи на партиите од новата коалиција изразија поддршка на новата влада и упатија критики на досегашното владеење на Курти. Лидерот на опозициската Демократска партија на Косово (ПДК), Кадри Весели изјави дека пратениците на неговата партија нема да го поддржат кабинетот на Хоти, затоа што не очекуваат дека ќе донесе нешто добро на земјата.
По изгласувањето, членовите на новиот владин кабинет поднесоа заклетва пред присутните пратеници во Собранието. Пред зградата на Собрaнието се собраа неколку десетици граѓани кои се спротивставуваат на формирањето нова влада и бараат одржување на нови избори.