Лидерот на Алијансата за иднина на Косово (ААК) Рамуш Харадинај објави дека е постигнат договор со Демократскиот сојуз на Косово (ЛДК) за формирање заедничка влада на чие чело ќе биде потпретседтелот на ЛДК, Авдулах Хоти. Харадинај, по средбата во Собранието на Косово, објави дека неговата партија ќе раководи со четири ресори (надворешни работи, образование, правда и економски развој) и ќе има еден вицепремиер.
Според него, новата влада ќе има ист број министерства (15), како и досегашната што беше предводена од Албин Курти.
Откако Собранието на Косово изгласа недоверба на владата на Курти на 25 март, косовскиот претседател Хашим Тачи го додели мандатот за формирање нова влада на партијата ЛДК која објави дека може да обезбеди потребно парламентарно мнозинство за поддршка на кабинетот што ќе го предложи Хоти.