Собранието на Косово за денеска (11 ч.) закажа вонредна седница на чиј дневен ред е гласање по предлогот на кандидатот на Демократскиот сојуз на Косово (ЛДК), Авдулах Хоти, за состав на новата Влада.
ЛДК и Хоти објавија дека го обезбедиле потребното мнозинство од 61 глас во Собранието по постигнатиот договор за коалиција со Алијанса за иднината на Косово (ААК) на Рамуш Харадинај и Социјалдемократска иницијатива (Нисма) на Фатмир Лимај, како и со партиите на српската и на другите немнозински етнички заедници. Ова доаѓа по изгласаната недоверба на досегашната Влада предводена од лидерот на Движењето „Самоопределување“ на 25 март.
Иако не одговори на неколкуте повици на Тачи да именува кандидат за формирање нова влада, Движењето „Самоопределување“ пред Уставниот суд го оспори неговото право за доделување на мандатот на друга партија, освен на победничка на последните избори. Од таму тврдеа дека нова влада може да се формира единствено по нови избори што би се одржале по завршување на пандемијата на ковид-19.
Минатиот четврток (28 мај), Уставниот суд го отфрли барањето на „Самоопределување“, а завчера ја објави и конечната одлука со што му се овозможи на Хоти да ја формира новата влада.
Од досега владеачкото Движење „Самоопределување“ најавија дека на денешната собраниска седница ќе реагираат „согласно мандатот добиен од граѓаните“, но одбија да одговорат на новинарските прашања за тоа какви дејствија ќе преземат.