Интервентното производство на електрична енергија најбрзо може да почне во текот на декември, а компаниите во текот на ноември ќе треба да го издржат ценовниот шок на електричната енергија.
Генералниот директор на АД ЕСМ, Васко Ковачевски, по средбата во Стопанската комора на РСЕ, рече дека согласно планот за 2021-2022 година, количините на јаглен од сопствено производство стопроцентно ќе го задоволат производството на електрична енергија за универзалниот снабдувач ЕВН Хоум што ги покрива домаќинствата и дека објавиле меѓународен повик за набавка на јаглен за производство на дополнителни количини енергија, кои ќе бидат понудени до стопанските субјекти по берзански цени.
Со ова сакаме да помогнеме на стопанството да имаат пониска цена на електричната енергија, да го задржат производството или цените кои ги имаат кон нивните договорни органи. Притоа и државата да излезе во пресрет на стопанските субјекти, но и компанијата да оствари дополнителен профит, изјави Ковачевски.
Тој најави дека ќе се поттикнат и домашните компании да се вклучат во процесот на набавка и продажба на јаглен и енергија, што ќе значи стабилност на електроенергетскиот систем во државата.
Во текот на ноември треба да почне првата испорака на количини, а планот за производство на дополнителна електрична енергија е да почне во декември, јануари, февруари, март и до средината на април следната година, кога завршува грејната сезона 2021-2022 година, изјави Ковачевски.
Претседателот на Регулаторната комисија за енергетика, Марко Бислимовски посочи дека според податоците со кои располагаат, осум снабдувачи на електрична енергија ги прекршиле договорите.