Вкупната бројка на ковид-дијагностицирани лица во земјава од почетокот на епидемијата достигна 193.458, од кои во моментот се активни 10.819, откако вчера беа регистирани 406 нови случаи од вкупно направени 3.149 тестирања. Од почетокот на епидемијата бројот на оздравени пациенти е 175.881, а на починати 6.758. Досега во земјата се направени вкупно 1.308.188 милиони тестирања на ковид-19.
Надлежните аплираат до граѓаните да ја искористат можноста и да се вакцинираат. Околу 75 отсто наставници во училиштата се вакцинирани, а настава на далечина следат околу два процента од учениците, соопшти вчера Министерството за образование и наука (МОН).
Со одлука на Владата, училиштата одржуваат онлајн-настава за оние ученици за кои родителите ќе го побараат тоа од медицински и од немедицински причини. МОН очекува дека со континуираната имунизација ќе се обезбеди дополнителна сигурност и услови за продолжување на наставата со физичко присуство.
Од понеделник треба да почне и најавениот скрининг на околу 8.200 ученици во основните и средните училишта со цел да се добие податок дали има трансмисија на вирусот во училиштата. Тестирањето за присуство на ковид-19 со земање брис ќе биде по случаен избор на учениците од регистарот на Е-дневник и со согласност на нивните родители.
Министерот за здравство Венко Филипче најави дека е планирано скринингот да трае пет дена и дневно да бидат тестирани по околу 1.600 деца од мобилни екипи во самите училишта.
Од ресорното Министерство информираат дека вакцинацијата се одвива непречено. Заклучно со 5 октомври, вкупно се вакцинирани 792.174 граѓани, ревакцинирани се 740.822, а трета доза примиле 499 граѓани.
Ревакцинирани се 53 отсто од граѓаните над 40-годишна возраст, а 33 отсто од популацијата од 18 до 39 години примиле барем една доза на вакцина.
Опфатот со вакцинација со една доза на вакцина, на полнолетната популација е 47 отсто, а со две дози опфатени се 44 отсто од граѓаните над 18 години.