Американскиот државен секретар Мајк Помпео вчера во Вашингтон се сретнал со грчкиот министер за надворешни работи Никос Коѕијас.
По завршување на средбата, Коѕијас за дописниците на Грција изјави дека ја поддржува потребата да се прифати име од предлозите на Нимиц.
-Ние ја поддржуваме потребата да прифатиме едно од имињата што ги предложи Нимиц, не се согласуваме, како што знаете, со петтото име од неговите предлози, и да одиме напред кон усвојување на еден стратешки план за пријателска соработка со оваа земја во иднина, со нејзиното ново име, рече Коѕијас, со што индиректно го отфрли предлот „Република Илинденска Македонија“.
Во однос на петте предлози на Нимиц, Грција досега се изјасни дека името „Република Македонија (Скопје) е неприфатливо.
Шефот на грчката дипломатија објасни дека за прашањето со името не разговарал со американскиот државен секретар Мајк Помпео, туку тоа било тема на средбите, вчера и завчера, со помошникот државен секретар на САД, Вес Мичел.
Коѕијас не открил за што разговарале со Мичел, но вели дека „никој не ја тера Грција на ништо“ во однос на затворањето на прашањето, бидејќи ја има иницијативата за постапките и сите на позитивен начин следат како една земја со активна надворешна политика промовира решенија“.
Уставни измени само за Илинденска Македонија
Премиерот Зоран Заев вчера одговарајќи на новинарско прашање рече дека предлогот „Република Илинденска Македонија” треба да се разгледа длабински и да не се отфрла, зашто „ги исполнува очекувањата на мнозинството граѓани на двете земји“ и може да стави крај на деценискиот спор меѓу двете земји.
„Република Илинденска Македонија е име кое не го загрозува, туку напротив го зајакнува идентитетот на Македонија, а на Грција и дава сложено име со временска одредница“ рече Заев.
Заев вели дека се работи за пакет кој не може да се дели.
„Зборуваме за пакет, а не за поединечни делови. Не може да се очекува уставна промена во Македонија за било кое решение, затоа ние прифативме уставна промена, затоа што е решение кое не не понижува. Ќе го сочуваме нашето достоинство, а притоа идентитетските прашања се фиксирани, а притоа ги исполнуваме и нивните услови“, рече премиерот Заев.
Дали постои можност за приближување на ваквите спротивставени ставови, ќе покаже средбата на министрите за надворешни работи на Македонија и Грција Никола Димитров и Никос Коѕијас во четврток и петок во Њујорк со медијаторот Метју Нимиц.
Во Македонија нема најави во кој правец ќе води оваа средба. Но затоа, грчките медиуми, повикувајќи се на неименувани извори објавуваат дека оваа средба, можеби е и последна шанса за договор.
„Оваа средба е од исклучиво значење и особено клучна за текот на преговорите. Можеби е и последна шанса за напредок по „бродоломот“ со името „Илинденска Македонија“ и враќањето на петте почетни имиња што ги достави Метју Нимиц. Секако, двете имиња што преовладуваат се Нова и Горна Македонија и веројатно разговорите ќе се движат околу овие сценарија, пишува електронското издание на грчкиот весник.