Хрватска е елиминирана во борбата за полуфинале на Светското ракометно првенство. По шокантниот пораз од Бразил, „коцкестите“ загубија и од Германија со 21:22 и од лидери во групата Е, паднаа на четвртото место на коло до крајот на главната групна фаза.
Хрватите и Германците одиграа одличен натпревар во „Ланксес арена“. Средбата во најголем дел беше во резултатски егал до средината на второто полувреме кога „панцерите“ за првпат отидоа на плус 3 (18:15). Но, наредните девет минути не постигнаа ниту еден за што најзаслужен беше хрватскиот голман Марин Шего чии, пак, колеги врзаа четири за пресврт 18:19.
Финишот, сепак, им припадна на домашните на крилја на публиката. Можеше Хрватска до реми со кое ќе останеше во игра за Фајналфор, но нападот за израмнување беше прекинат од судиите кои видоа пробивање од Игор Карачиќ на што Германија одговори со гол за 22:20 за затворање на мечот.
Лидер во победничката екипа беше Фабијан Виде со шест гола, Уве Генсхајмер додаде четири. Игор Карачиќ и Мануел Штрлек постигнаа по четири гола за Хрватска.
Утре е слободен ден на шампионатот пред завршните пресметки што се закажани во среда. Дилеми околу полуфиналистите од групата Е нема. Во борбата за распределба на медалите ќе патуваат Германија и Франција, само прашање е од која позиција. Затоа вниманието го привлекува групата Ф во која една од трите скандинавски селекции ќе излезе од игра. Данците се лидери со 8 бода и во среда од 20.30 часот ќе играат со Швеѓаните кои се втори со шест бода колку што имаат и Норвежаните на третото место.
СП во ракомет – главна фаза
Група Е, 4 коло
Хрватска – Германија 21:22
Шпанија – Бразил 36:24
Табела: Германија 7, Франција 7, Шпанија 4, Хрватска 4, Бразил 2, Исланд 0.
Идно коло (среда): Бразил – Исланд (15.30 ч.), Франција – Хрватска (18 ч.), Германија – Шпанија (20.30 ч.).
Група Ф, 4 коло
Египет – Данска 20:26
Шведска – Норвешка 27:30
Табела: Данска 8, Шведска 6, Норвешка 6, Унгарија 3, Египет 1, Тунис 0.
Идно коло (среда): Тунис – Египет (15.30 ч.), Норвешка – Унгарија (18 ч.), Данска – Шведска (20.30 ч.).