Екипите на Шкупи, на Академија Пандев и на Македонија Ѓ.П. се простија од Лига Европа по првата квалификациска рунда. Чаирчани загубија од Пјуник на арената „Тоше Проески“ со 1:2 и останаа без второ коло во второто, по квалитет, натпреварување на УЕФА иако имаа најголеми шанси за прогрес со оглед на ремито (3:3) по првата средба во Ереван. Артак Једигарјан во 7. минута и Артур Миранјан во 31. минута погодија за ерменскиот тим, единствениот за македонскиот го запиша Марин Јурина во 82. минута. Шкупи го заврши мечот со играч помалку по исклучувањето на Сержињо во 86. минута.
Зрињски го доби и реваншот против струмичани на домашен терен со 3:0, идентично како и во Скопје пред една недела, и рутински се пласира во наредното коло во кое ќе игра против холандски Утрехт. Сите три гола во Мостар попладнево беа постигнати во второто полувреме. Станиша Мандиќ реализира во 50. минута, Милјан Говедарица во 79. минута, а печат на севкупниот триумф стави Ренато Гојковиќ во судиското екстра време (90’+2’).
Ѓорчепетровци го дочекаа Алашкерт со негатива од 1:3 по првата средба во Ереван. Но, не дочекаа да се радуваат како патници за второто коло во Лига Европа. Ерменците и во Скопје славеа со 3:0 и си закажаа дуели со ФЦСБ од Букурешт, екс Стеауа. Урош Ненадовиќ во 21. минута погоди за 1:0, Тиаго Галвао во 68. минута зголеми на 2:0, конечниот резултат на тренинг комплексот при Фудбалската федерација на Македонија беше дело на Тарон Восканјан во 74. минута.
Во моментот на арената „Тоше Проески“ се игра реваншот меѓу Шкупи и Пјуник. По нерешените 3:3 во Ереван, Ерменците имаат предност од 2:0 на полувреме, резултат што ги носи во наредната фаза.
Македонскиот фудбал, сепак, ќе има репрезент во второто квалификациско коло за Лига Европа во Шкендија. Тетовци, по елиминацијата од Номе Калју во Лигата на шампионите, се приклучуваат од второто коло во второто по ранг клупско натпреварување на УЕФА и во вторник се домаќини на Диделанж од Луксембург.