Американскиот амбасадор во Белград, Кристофер Хил, денеска изјави дека САД разбираат оти Србија има свое историско искуство со санкциите, но, како што истакнува, почнала да плаќа превисока цена за воздржаноста во прашањето за санкциите против Русија.
Хил, одговарајќи на новинарски прашања, колку е реално ЕУ да воведе санкции кон Србија доколку Србија не го прифати новиот европски предлог за решение на косовското прашање, рече дека не е во позиција да зборува за тие можни санкции, но дека ЕУ е сериозна во врска со санкциите против Русија во кои учествуваат сите иако не им е лесно.
„Санкциите наметнати од ЕУ кон Русија беа воведени за да се запре страшната и незаконска агресија врз нејзиниот сосед – Украина“, изјави Хил за новинарите пред почетокот на конференцијата „Борба за заробување на државата во Југоисточна Европа“.
Тој додава дека што се однесува до САД и ЕУ, европскиот предлог е вистинскиот пат што треба да се следи за да се реши проблемот што не оптоварува сите повеќе од 20 години.
„Затоа треба сериозно да го разгледате овој предлог и да размислите како да го усвоите и да работите на него“, рече Хил.
Одговарајќи на новинарско прашање дали му се чини дека Белград е поподготвен да го прифати европскиот предлог од Приштина и Албин Курти, Хил вели дека Европејците вложиле големи напори да ги зближат двете страни и во оваа смисла потсетува дека на двапати советници престојуваа и во Белград и во Приштина за национална безбедност.
„Сите се обидуваат да најдат решение за да можеме уште еднаш да видиме воспоставување мир и позитивни ситуации во регионот. САД 100 проценти го поддржуваат предлогот на ЕУ, се разбира, тоа е процес и ништо не е завршено додека не се заврши. Тоа значи дека ќе биде потребно време. Што се однесува до Албин Курти имавме многу средби со него, но јас не би ги кажал неговите ставови наместо него“, рече американскиот амбасадор.