Ако Владимир Путин е централната фигура на Истокот, а по преземањето на власта во САД, Доналд Трамп стана најмоќната политичка фигура на Запад, претседателот на Кина, Кси Џинпинг со неодамнешното потврдување на своето влијание во Комунистичката партија на Кина, сигурно станува третиот најмоќен лидер со Путин и Трамп.
Џинпинг во средата го објави новото лидерство на партијата, каде што според аналитичарите, нема очигледен негов наследник, со што само ја зацврстил својата моќ и се подготвил за повеќедецениско владеење.
Ако се земе в предвид дека тој раководи со втората, ако не и прва економија во светот, и со една од најсилните војски во светот, Кси Џинпинг сигурно ќе има огромно влијание помеѓу лидерите од светот.
Додека Ангела Меркел во Германија, Тереса Меј во Обединетото Кралство, Трамп во САД па дури и Путин во Русија се соочуваат со предизвици од своите политички противници, Џинпинг целата моќа ја има во своите раце и раководството.
Како што рече тој за време на свечена церемонија во Пекинг во средата, под негово раководство, Кина ќе ја зацврстува својата позиција, безбедноста во земјата како и развојот на глобално ниво кој ќе ги штити интересите на Кина.
Моќта на Кси Џинпинг оди до таму што аналитичарите го споредуваат со Мао Це Тунг.
За време на конгресот на Комунистичката партија овој месец, паролата „Мислата на Кси Џинпинг“ речиси влезе како дел од Уставот на Кина, нешто што досега му успеало на Мао Це Тунг и на Денг Ксиаопинг.
Според експертот за политичката состојба во Кина, Френк Чинг, во Кина доаѓала „нова ера“ која ќе се надоврзува на визиите на Мао Це Тунг и Ксиаопинг.
„Мао ја воспостави Народна Република Кина, Денг и донесе богатство а сега Кси ќе донесе моќ“, вели тој.