Шкендија и Пелистер одново на мегдан во само четири дена. По првенствената пресметка во неделата во Тетово, двете екипи вечерва на судир во Струмица во финалето на фудбалскиот Куп на Македонија. Мечот за титулата на стадионот „Младост“ е со почеток во 20 часот и воедно претставува реприза од минатогодишниот во кој на битолчани се покажаа како подобри пеналџии (0:0 во основниот дел, 4:3 во ударите од белата точка).
„Првенствените резултати нема да дозволиме да нè залажат. Во финалето ќе влеземе со максимално сериозен пристап и респект кон противникот бидејќи е еден меч и нема поправен. Желба н` е триумф за завршување на сезоната со двојна круна што би била прва во клупската историја на Шкендија. Ја прифаќаме фаворитската улога, но имаме обврска да ја потврдиме на терен. Верувам дека ќе биде така“, порача тренерот на Шкендија, Ќатип Османи.
Пелистер ќе истрча на струмичкиот тревник вечерва во улога на бранител на тронот. Меѓутоа околностите кај битолските „зелени“ се спротивни одошто беа во истиот период лани. Од солиден прволигаш и македонски претставник во Европа, екипата од „Под Тумбе кафе“ се трансформира во второлигаш за наредната сезона, повторно се соочува со премрежја и неизвесност и со најави за нов одлив на играчкиот кадар ова лето. Пелистерци се свесни за улогата на аутсајдери што ја носат, но иако се распнати меѓу оптимумот на сопствените можности и квалитетот на ривалот, сепак, посакуваат победа што би била сензација вечерва.
„Шкендија е голем фаворит. На убедлив начин го освоија првенството и покажаа дека ја имаат најдобрата екипа во Македонија во последните неколку години. Наша обврска како бранители на титулата е да се претставиме во најдобро издание и да дадеме најсилен отпор што можеме. Однапред нема предавање, ќе се бориме до крај“, изјави Неџат Хусеин, предводник на Пелистер.
Шкендија и Пелистер вечерва по петти пат ќе играат во финалето на Купот на Македонија. Тетовци имаат само една титула по триумфот над Работнички со 2:0 во сезоната 2014/15 (порази од Македонија Ѓорче Петров, од Тетекс и од Пелистер), битолчани, пак, двапати ги понесуваа трофејот во натпреварувањето по победите против Слога Југомагнат со 2:1 во сезоната 2000/01 и лани и двапати беа поразени од Вардар и од Силекс во сезоните 1992/93 и 1993/94.