Вршителот на должноста премиер на Косово, Албин Курти вели дека за настаните во Куманово од мај во 2015 година во кои загинаа осум македонски полицајци и десет припадници на таканаречената „кумановска група“ што го предизвика крвавиот конфликт, треба да се спроведе сеопфатна независна меѓународна истрага.
Запрашан „дали е можно Косово да преговара за косовските граѓани кои се наоѓаат во затвор во Македонија“, Курти во емисијата „ДПТ“ на приштинската телевизија „Т7“, рече дека, според него, „тие луѓе немаат потреба од преговори меѓу двете влади, туку имаат потреба од еден истражен процес, кој ќе биде независен од сам почеток“.
„Ние треба да разговараме со Владата на Северна Македонија, меѓутоа ние сме Влада во оставка, а и таму има техничка Влада. И таму и кај нас нè очекуваат избори. За тој случај е потребна една таква независна истрага, за која и ние треба да го дадеме придонес, а посебно меѓународниот фактор кој ќе ја открие вистината и ќе воспостави правда“, изјави Курти.
Тој изрази сомневање дека целиот настан, поради кој македонскиот суд осуди 37 лица, повеќето од Косово, на казна од вкупно 746 години затвор, „бил наместен“ и дека се работело за „стапица“ во која упаднала групата Албанци.
Во тој контекст, Курти напомена дека настаните од пред пет години во кумановското „Диво насеље“ се случија во време кога македонски премиер беше Никола Груевски, кој, како што нагласи, во тоа време „беше мошне близок“ со властите во Србија.
„Тогаш на власт беше еден режим на Никола Груевски, кој беше мошне близок со Белград и има многу непознаници за тоа што се случи во Куманово. Се чини дека имаше стапица и треба да се види кои беа сценаристите и режисерите на таа стапица, а не само актерите кои завршија на сцената која се урна. Во овој аспект јас сметам дека е потребна една независна меѓународна истрага, со тоа што ќе се направи и дистанцирање меѓу режимот на Груевски и актуелните власти во Северна Македонија“, изјави Курти во синоќешното интервју за приштинската „Т7“.