Идејата на косовскиот претседател Хашим Тачи за корекција на границите со Србија за лидерот на опозициското движење „Самоопределување“, Албин Курти е негова „лична авантура“ и порача дека што поскоро мора да запре.
Курти на конференција со првите луѓе на ограноците на движењето нагласи дека не смее да се дозволи таа опасна игра на Тачи да продолжи.
„Оваа лична авантура на претседателот мора да запре. Мора да ја прекинеме таа опасна игра, рече Курти кој е на чело на втората по големина опозициска партија во косовското Собрание.
Тој истакна дека не е против формирање на тим за преговори со Србија, но само откако соседната држава ќе понесе одговорност за убиствата, исчезнатите лица, силувањата и грабежите во последната војна.
„ На Србија треба да ` се достави таков список и да се каже дека имаме 1.500 исчезнати лица и 20.000 силувани жени. Ние имаме потреба да се обратиме на Србија за тоа што го должи. Се согласувам дека еден ден треба да има таков преговарачки тим, но не без да минат неизбежните фази“, порача Курти.
Курти минатата недела ги повика косовските граѓани, политички партии и граѓански организации на протестот што „Самоопределување“ го закажа на 29 септември во Приштина. Целта е, како што рече самиот, „да запре пазарењето со границите на Косово“, „државата да се одбрани од Тачи“ и народот на Косово да покаже дека „не се потчинува на еден човек“.