Сигурни победи на Франција, Шведска, Португалија и БиХ, тешка и тесна на Швајцарија, а Холандија и Грција ги закомпликуваа своите позиции во квалификациите за Светското фудбалско првенство во Русија во 2018 година по мечевите од петтата рунда во групите А, Б и Х.

Изненадување на вечерта приреди репрезентацијата на Бугарија која во Софија ги порази „лалињата“ со 2:0. Спас Делев во 5. и во 20. минута ги фрли во транс гледачите на „Васил Левски“ и најави ново можно отсуство на Холанѓаните од завршницата на големите турнири.

Со двата гола на Оливие Жиру и на Антоан Гризман, Франција го совлада Луксембург со 3:1 и се одржа на првото место во групата А. Во рамки на истата конкуренција и без Златан Ибрахимовиќ, Швеѓаните ја поразија Белорусија со 4:0. Двапати погоди Форсберг, по еднаш Берг и Телин за трета победа во циклусот.

Португалија не дозволи повторно да биде изненадена од Унгарија како што беше случај со ремито (3:3) на минатогодишното ЕП. Роналдо и компанија и во Лисабон, синоќа, постигнаа три гола, но, за разлика од Лион, не примија ниту еден. Два погодока даде ѕвездата на мадридски Реал, третиот за домашните, прв на средбата, беше дело на Силва.

Швајцарија останува без пораз во групата Б по првата половина од натпреварите. Со голот на Дрмиќ во 66 минута, по асистенција на Мехмеди, совладана е селекцијата на Летонија со 1:0. Андора и Фарски Острови одиграа без голови во Ла Вела.

И, конечно, во групата Х, Белгија и Грција, во дербито, одиграа без победник (1:1), епилог каков имаше и на средбата меѓу Кипар и Естонија (0:0). Единствената победа ја запишаа репрезентативците на БиХ кои на „Билино поле“ во Зеница славеа над Гибралтар со 5:0.

Квалификации за СП 2018

Резултати, 5 коло

Група А

Луксембург – Франција 1:3

Шведска – Белорусија 4:0

Бугарија – Холандија 2:0

Табела: Франција 13, Шведска 10, Бугарија 9, Холандија 7, Белорусија 2, Луксембург 1.

Идно коло (9 јуни): Шведска – Франција, Белорусија – Бугарија, Холандија – Луксембург.

Група Б

Португалија – Унгарија 3:0

Швајцарија – Летонија 1:0

Андора – Фарски Острови 0:0

Табела: Швајцарија 15, Португалија 12, Унгарија 7, Фарски Острови 5, Летонија 3, Андора 1.

Идно коло (9 јуни): Фарски Острови – Швајцарија, Летонија – Португалија, Андора – Унгарија.

Група Х

Белгија – Грција 1:1

Кипар – Естонија 0:0

БиХ – Гибралтар 5:0

Табела: Белгија 13, Грција 11, БиХ 10, Кипар 4, Естонија 4, Гибралтар 0.

Идно коло (9 јуни): Естонија – Белгија, БиХ – Грција, Гибралтар – Кипар.