Шкендија го совлада естонски Номе Калју со 1:0 во првиот меч од првото квалификациско коло за Лигата на шампиони на УЕФА. Стрелец на единствениот погодок на стадионот „Кардиору“ во Талин беше Агим Ибраими во 81. минута од мечот. Реваншот е во Скопје (16 јули) со почеток во 17 часот.
„Можевме и моравме порано да ја обезбедиме победата и на, резултатски, поубедлив начин. Но, задоволство е, секако, присутно. Прво поради европскиот карактер на мечот, второ поради тоа што е прв натпреварувачки за нас ова лето. Триумфот, сепак, не смее да нè залаже. Работата мора да ја довршиме во Скопје и да се потвдиме во второто коло“, истакна тренерот на Шкендија, Ќатип Османи.
Севкупниот победник од двомечот во второто коло ќе игра со подобриот од дуелите меѓу Сараево и Селтик. А, по исходот во Естонија попладнево, многу поблиску до пресметки со славниот шкотски клуб е македонскиот шампион.
Шкендија и Номе Калју се четвртата македонско-естонска двојка во европските фудбалски купови. Работнички во минатото го елиминира Нарва Транс и Флора Талин во квалификациите за Лига Европа додека Победа беше поразена од Левадија Талин во квалификациите за Лигата на шампиони во 2007 година.
Покрај Шкендија, македонскиот фудбал ќе има уште три претставници во Европа ова лето. Шкупи во четврток (15.30 ч.) ќе гостува во Ереван на екипата на Пјуник, во ерменската престолнина во четврток (17 ч.) ќе игра и Македонија Ѓорче Петров против тимот на Алашкерт, а освојувачот на националниот Куп на арената „Тоше Проески“, исто така во четврток (19 ч.) е домаќин на Зрињски од Мостар. Сите три меча се квалификациски за Лига Европа.