Дуелот меѓу Франција и Холандија на хартија го понесе епитетот дерби во вечерашните девет натпревари во квалификациите за Светското фудбалско првенство во Русија во 2018 година. Но, претставата на „Стад де Франс“ донесе еднонасочни 90 минути што „триколорите“ ги добија со 4:0 и се издвоија на врвот на табелата во групата А со 16 бода, три повеќе од Шведска која загуби од Бугарија во Софија со 3:2.
https://www.youtube.com/watch?v=XbcpTvRQdgg
Двапати Лемар (73′ и 88′) и по еднаш Гризман (14′) и Мбапе (90’+1′) го совладаа Силесен за продолжување на резултатската агонија на Холанѓаните на кои им беше неопходен резултат во Париз. Вака остануваат во неизвесност за место на мундијалот на три кола до крај на натпреварите по групи.
За нивна среќа и Швеѓаните загубија на стадионот „Васил Левски“, па заедно со Бугарите се наоѓаат на само три бода разлика и со подеднакви шанси за второто место. Шведска во недела ќе гостува во Белорусија додека Холандија ќе игра со Бугарија на „Јохан Кројф арена“ во Амстердам. Од групата А уште и за минималната победа на Луксембург над Белорусија со 1:0.
Фаворитите во групата Б според планот
Домашните селекции ја оправдаа фаворитската улога во групата Б и останаа на иста бодовна разлика на табелата. Швајцарија со 3:0 ја совлада Андора, Португалија со 5:1 беше подобра од Фарски Острови, а Унгарија од Летонија со 3:1.
Швајцарците се лидери во конкуренцијата со 21 бод. Зад нив се Португалците со 18, дури осум повеќе од Унгарците.
Белгија броеше до девет против Гибралтар, БиХ прокоцка 2:0 на Кипар
Белгија ја забележа најубедивата победа вечерва во мундијалските квалификации. Во Брисел „настрада“ Гибралтар со 9:0 пришто хет-трик постигнаа Ромелу Лукаку (21′, 38′, 84′) и Томас Муние (18′, 61′, 67′), а по еднаш во листата на стрелци се додадоа Дрис Мертенс (16′), Аксел Витсел (27′) и Еден Азар (45′).
Што се случи со БиХ во Никозија знаат само избраниците на Мехмет Баждаревиќ. Имаа предност од два гола по првото полувреме против Кипар чии фудбалери направија пресврт во продолжението за конечни 3:2 и враќање во игра за СП 2018.
Тони Суњиќ во 33 минута и Един Вишча во 44 минута обезбедија одлична предност за репрезентацијата на БиХ која се што градеше на „ГСП“ стадионот во нешто повеќе од еден час игра, дозволи да го прокоцка за 11 минути. Домашните преку Деметрис Христофи (65′), Винсент Лабан (67′) и Пирос Сотириу (76′) трипати го совладаа Асмир Беговиќ и ги сочуваа трите бода со кои стигнаа до 10 во групата Х, еден помалку од нивниот вечерашен ривал на третото место и два од второпласираната Грција.
Квалификации за СП 2018
Група А, 7 коло
Франција – Холандија 4:0
Бугарија – Шведска 3:2
Луксембург – Белорусија 1:0
Табела: Франција 16, Шведска 13, Бугарија 12, Холандија 10, Белорусија 5, Луксембург 4.
Идно коло (3 септември): Франција – Луксембург, Белорусија – Шведска, Холандија – Бугарија.
Група Б, 7 коло
Швајцарија – Андора 3:0
Португалија – Фарски Острови 5:1
Унгарија – Летонија 3:1
Табела: Швајцарија 21, Португалија 18, Унгарија 10, Фарски Острови 5, Андора 4, Летонија 3
Идно коло (3 септември): Летонија – Швајцарија, Унгарија – Португалија, Фарски Острови – Андора.
Група Х, 7 коло
Кипар – БиХ 3:2
Грција – Естонија 0:0
Белгија – Гибралтар 9:0
Табела: Белгија 19, Грција 13, БиХ 11, Кипар 10, Естонија 5, Гибралтар 0.
Идно коло (3 септември): Грција – Белгија, Гибралтар – БиХ, Естонија – Кипар.