Македонската фудбалска репрезентација нема што да загуби вечерва (20,45 ч.) на „Телеком арена“ во Скопје против моќната Шпанија во квалификациите за СП 2018. Во мечот се влегува со цел на задржување на играчкиот континуитет од последните неколку настапи, да се освојат симпатиите на јавноста и максимално да се намачат фаворизираните гости. На сензација од типот на Андора против Унгарија во петокот никој и не помислува иако секој, потајно, го посакува тоа.
„Посебни мотиви се непотребни. Името на противникот, реномето што го носи и настапот на домашен терен, само по себе, се доволна причина во желбата за добар настап. Наш гостин е репрезентацијата што се вбројува меѓу најдобрите четири во светот. Силно го респектираме ривалот, меѓутоа не стравуваме. Против селекции каква што е шпанската очекувам и наши добри изданија. Тактички отстапки ќе нема, а верувам дека ќе има и причини за задоволство“, изјави Игор Ангеловски, селектор на репрезентацијата на Македонија.
Репрезентативците веќе десетина дена се подготвуваат за вечерашниот настап што од аспект на величината на гостинот е втор во групата во Скопје по Италија во октомври лани. Фокусот паѓа на сопствената игра, свесни се дека текот на средбата во голема мера ќе зависи од скапите шпански фудбалски ѕвезди, но истовремено е присутна и желба за демонстрација на капацитет дека може и „црвено-црните“ да се прашаат за нешто.
„Шпанија е селекција што негува офанзивен фудбал што е добро и за противниците. Таквиот начин на игра остава простор за закана по нејзиниот гол. Посакувам да имаме што повеќе прилики за лов на контранапади во обид да изненадиме. Десет дена сме заедно, десет дена се подготвуваме и уверен сум дека ќе одиграме квалитетен меч. Давид Силва ќе биде најголема закана по нашиот гол, се надевам дека ќе се остварат прогнозите на нивниот селектор Лопатеги дека Несторовски ќе биде опасноста по нив“, коментира капитенот, Горан Пандев.
Македонија и Шпанија вечерва ќе се пресметаат по седми пат. Сите шест досегашните дуели ѝ припаднаа на „црвената фурија“. Во квалификациите за ЕП 1996 славеа со 3:0 и 2:0, во циклусот за ЕП 2016 со 5:1 и 1:0, во ноември лани со 4:0 и во пријателски меч во Скопје во 2009 година со 3:2.
Покрај мечот во Скопје, во нашата група Г вечерва ќе играат уште Италија – Лихтенштајн и Израел – Албанија. „Фуријата“ и „азурите“ се лидери на табелата со 13 бода пред Израелците на третото место со девет. Втората половина ја предводи Албанија со шест бода, Македонија е претпоследна со три и фенерот го држи Лихтенштајн кој по пет кола е без освоен бод.