Во стравување од заканата на феноменот лажни вести во пресрет на овие десети по ред европски избори, владите на земјите членки на Европската Унија (ЕУ) создадоа „тимови“ за да ги спречат лажните вести. Европската комисија објави правила за справување со дезинформации. Се придружи и Фејсбук кој отвори т.н. воена соба со 40 вработени лица во Даблин за да се запре ширењето на лажните приказни на интернет. Но, и покрај овие напори, гласачите сé уште се соочуваат со софистицирана кампања за дезинформација на интернет
Неуспехот да се запрат дезинформации, вклучувајќи ги и пораките со говор на омраза за имиграцијата и исламот, широко распространети на социјалните медиуми, ги илустрира ограничувањата на актуелните напори на креаторите на политиката и на компаниите да се справат со она што стана проблем на изборите ширум светот
Ако до скоро групите кои работеа на манипулации со јавното мислење досега беа воглавно инспирирани од Кремљ, сега пејсажот очигледно се менува. Актерите вклучени во оваа закана за демократијата се мултиплицираа преку екстремистичките групаци во сите земји членки.
„Сè уште има многу работи што ни се потребни. Треба да се направи повеќе во однос на лажни профили и ботови, повеќе корекции се потребни на системите што ги воспоставивме и дефинитивно треба да дадеме повеќе простор за независна контрола. Овие групи ги менуваат и развиваат нивните тактики за пенетрација во интернет просторот“, изјави Џулијан Кинг, европски комесар задолжен за безбедноста.
Механизмите за пресретнување на лажните вести детектираат содржини кои шират антагонизм кон Европската унија, омраза кон етаблираните политички личности како францускиот Емануел Макрон и се разбира нивната дежурна тема каква што се мигрантите.
Аналитичарите велат дека е тешко да се измери влијанието на оваа операција, но, секако, не се безначајни особено во ситуации како во Франција каде што се води мртва трка меѓу претседателот Макрон и екстремната десница на Ле Пен во која секој глас може да има пресудно влијание
„Повеќето дезинформации се базирани на факти, а потоа манипулирани за да дојдат до поинаков заклучок”, изјави во интервју за Политико, Микаел Тофвесон, заменик-шеф на одделот во Шведската агенција за вонредни состојби, чиј тим е задолжен да се спротивстави на странските обиди за поткопување на демократските институции во овој европски изборен циклус.
Во рамките на националистичките Фејсбук групи, Твитер мрежите и веб-сајтовите што ги задоволуваат екстремните внатрешни политики, како на левицата така и на десницата, доминира мешавина од анти-естаблишмент, анти-имиграција и анти-ЕУ реторика. Содржината креирана во една земја честопати е брзо преведена и споделена со, или позајмени од, слични групи во други земји на ЕУ.
Во Италија на пример, тоа вклучува наводи дека Џорџ Сорос, сака да манипулира со исходот на европските избори. Во Германија, екстремистички групи шират вести за конспирација на левицата во случајот на откривање на аферата на австрискиот вицеканцелар. И во Франција, екстремно десничарските сајтови рутински ги истакнуваат наводните злосторства на африканските имигранти за да поттикнат омраза и поделби.
Оваа недела во пресрет на гласањето беа осомничени повеќе од 500 Фејсбук профили и групи низ цела Европа што шират лажни приказни или користат други манипулативни тактики за промовирање на екстремно десни или анти-ЕУ групи. Во Германија, јавната радиодифузна служба открила голема мрежа на веројатно автоматски Твитер сметки кои дистрибуираат десетици илјади пораки во корист на екстремистичката партија АФД.
Лажните вести се во нова офанзива, а демократските институции во дефанзива и обид да го најдат вистинското орудие со кое ќе го возвратат ударот.