Тројца македонски фудбалски репрезентативци славеа победи, двајца се поразени во денешните втори настапи со своите екипи во УЕФА Европа лигата. Четворица од нив беа стартери, еден постигна и гол, а еден остана без минутажа. Но, одиме по ред.
Челзи го совлада Види МОЛ на Бибан Николов со 1:0. Стрелец на победничкиот гол за „сините“ на „Стемфорд бриџ“ беше Алваро Мората во 70. минута по асистенција на Вилијан. Македонскиот интернационалец беше стартер кај унгарскиот претставник и го одигра сите 90 минути на Островот.
Баер во Леверкузен славеше над АЕК Ларнака со 4:2. Иван Тричковски го отвори резултатот на „Бај арена“ на што бундеслигашот одговори со три погодоци во основниот дел од средбата пред размената по гол на обете страни во судиското екстра време. Офанзивниот крилен репрезентативец на Македонија го почна мечот од првата минута и на тревникот остана до последната.
Аријан Адеми и Динамо Загреб победнички се враќаат дома од гостувањето во Белгија. Хрватскиот првак освои три бода на стадионот „Констан Ванден Сток“ во Брисел по триумфот над Андерлехт со 2:0. Македонскиот репрезентативец и капитен на „модрите“ одигра цел меч и, стандардно, беше меѓу најдобрите во својата екипа.
Со идентичен резултат како Динамо Загреб, но како домаќин победи и Фенербахче против Спартак Трнава. Елиф Елмас се најде во почетниот тим на турскиот состав и, исто така, беше меѓу најзабележителните на тревникот на „Шукру Сарачоглу“ во Истанбул.
Единствен македонски репрезентативец што остана на клупа беше Стефан Ристовски. Офанзивниот бек на Македонија почна и заврши како резерва во гостинската победа на Спортинг Лисабон против украинска Ворскла во Полтава со 2:1.
Лига Европа
Резултати, 2 коло
Група А: Баер Леверкузен – АЕК Ларнака 4:2, Цирих – Лудогорец 1:0
Група Б: Розенборг – Лајпциг 1:3, Салцбург – Селтик 3:1
Група Ц: Бордо – Копенхаген 1:2, Зенит – Славија Прага 1:0
Група Д: Фенербахче – Спартак Трнава 2:0, Андерлехт – Динамо Загреб 0:2
Група Е: Ворскла – Спортинг Лисабон 1:2, Карабаг – Арсенал 0:3
Група Ф: Милан – Олимпијакос 3:1, Бетис – Дуделанж 3:0
Група Г: Спартак Москва – Вилјареал 3:3, Глазгов Ренџерс – Рапид Виена 3:1
Група Х: Аполон – Олимпик Марсеј 2:2, Ајнтрахт Франкфурт – Лацио 4:1
Група И: Малме – Бешикташ 2:0, Сарпсборг – Генк 3:1
Група Ј: Краснодар – Севилја 2:1, Стандард Лиеж – Ахисар 2:1
Група К: Јаблонец – Динамо Киев 2:2, Астана – Рен 2:0
Група Л: Челзи – Види Мол 1:0, БАТЕ Борисов – ПАОК 1:4