Различни се реакции од Санкт Петербург, од Сан Себастијан и од Трондхајм по ждрепката за групите во Европа лигата на УЕФА. Зенит, Реал Сосиедад, Розенборг и Вардар ги очекуваат меѓусебни пресметки во Л конкуренцијата низ цела есен пришто секој од нив влегува со свои сметки и адути.
Најоптимистичко расположение има во таборот на рускиот претставник кој го има и највредниот коефициент во групата. Фудбалерите на Роберто Манчини се сметаат за фаворити, не само за шеснаесетфинале, туку и за освојување на првото место на табелата на што недвосмислено упатува Александар Кокорин чиј тим, во плеј-офот, го елиминира холандски Утрехт по продолженија.
„Не знам многу за Вардар, но останатите наши противници во групата се доста атрактивни. Имавме добра ждрепка и мислам дека можеме до нокаут фазата. Зенит, според мене, е прв фаворит во групата“, порачува репрезентативецот на „зборнаја“.
Од Норвешка, пак, доаѓа избалансиран коментар на групата. Го испорача Каре Ингебригтсен, тренер на Розенборг, кој освен на противниците се осврна и на искуството од минатото со стариот познаник, Роберто Манчини.
„Имам победа против него кога игравме со Италија во 1991 година“, се наврати Ингебригтсен на репрезентативниот триумф на Норвежаните над „азурите“ на стадионот „Улевал“ во Осло пред повеќе од две децении.
Но, за разлика, од Кокорин, тој воопшто не го спомена Вардар во кусиот коментар за групата. Додуша не го спомена ниту неговиот Розенборг што, веројатно со „црвено-црните“, го сместува во описот на групата како отворена до која стигна низ плеј-оф двомеч против Ајакс.
„Реал Сосиедад за мене е фаворит. Зенит е, финансиски, најбогат клуб, но, сепак, не игра како што и се очекува од него во последно време. Имам впечаток дека групата е прилично отворена и ќе биде неизвесна“, додека Ингебригтсен чиј тим што го предводи во моментот беше елиминиран од Зенит во шеснаесетфиналето во ЛЕ во сезоната 2005/06.
Сан Себастијан со возбуда беше дочекана ждрепката за групите во Лига Европа. Настанот во „Грималди Форум“ во Монако се следеше организирано во клупскиот фан-шоп во присуство на фудбалерот Карлос Мартинез и Жон Баутиста. И сето тоа на задоволство на голем број навивачи, особено дечиња кои си набавија примероци од нивните омилени дресови пришто добија и автограми од двајцата миленици.
„Пред нас е период на нови патувања низ Европа што секогаш претставува синоним за задоволство и уживање. Со оптимизам гледам на претстојните гостувања и желба дека ќе бидат повеќе од три за нас во сезоната. Зенит е силен, но силни сме и ние. Работевме напорно во изминатиор период и гледаме напред. Се надевам дека ќе играме добар фудбал, дека ќе успееме да ја минеме групата и да остане во Европа и наредната година што е наша цел“, истакна Мартинез.
Реал Сосиедад ги прескокна квалификациите за Лига Европа и, благодарение на освоеното шесто место во Примера, обезбеди директно учество во групната фаза за претстојната сезона. Тимот од „Аноета“ бележи одличен вовед во новиот шампионат на Шпанија. По триумфот над Селта во Виго со 3:2 во првото коло, синоќа го совлада и Вилјареал со 3:0 на домашен терен.