Шкендија по вторпат во низа ќе игра во плеј-оф за групна фаза во УЕФА Европа лигата. Тетовци попладнево во Струмица го совладаа Тракаи со убедливи 3:0 и се придружија на Вардар во утрешната ждрепка за последното скалило во второто по ранг европско клупско фудбалско натпреварување.
Двоен стрелец за „црвено-црните“ беше капитенот Ферхан Хасани во 42 минута и во 88., откако серијата голови на стадионот „Младост“ ја отвори Бесарт Ибраими во 29 минута. Гостите го завршија мечот без Климавичиус кој во 72 минута по вторпат влезе во жолтиот бележник на главниот судија.
Шкендија беше апсолутно подобар ривал во мечот и без премногу проблеми ја анулира предноста што Тракаи ја донесе од Вилнус. Фудбалерите во „црвено-црна“ комбинација им подарија на навивачите и три прекрасни гола од кои два дојдоа по закани од дистанца.
https://www.youtube.com/watch?v=NicVUxLiCUk
Најпрво Ибраими од околу 25 метри го совлада гостинскиот голман Плукас кој беше немоќен да спречи капитулација од, речиси, истата дистанца и во финишот на првиот дел. Хасани одлично го изведе слободниот удар што самиот го изнуди и со ефектен гол ги поведе соиграчите на одмор.
Шкендија не даде впечаток дека е задоволна во продолжението и покрај двата постигнати гола. Во бранови бараше и трет што дојде по контранапад. Во улога на асистент Шефит Шефит, во улога на егзекутор Хасани за елиминирање на секаква можост за евентуални продолженија за што гостите и не покажаа дека се кадарни да ги обезбедат.
Ова е трета победа на Шкендија што е изразена со три постигнати гола ова лето во Струмица. Со идентичен резултат (3:0) во првото коло беше совладана Дачија, а во второто беше поразен и Хелсинки со 3:1.
Шкендија – Тракаи 3:0 (2:0) – вкупен резултат 4:2
Стадион: „Младост“ во Струмица. Гледачи: 2.500. Гл. судија: Клејтон Писани. Асистенти: Алан Камилери и Евдард Спитери (сите трјца од Малта). Ж. картони: Воробјовас, Климавичиус, Јериоменко (Тракаи). Ц. картон: Климавичиус 72′ (Тракаи). Стрелци: Б. Ибраими 29′, Хасани 42′, 88′ за Шкендија.
Шкендија (формација: 4-2-3-1): Захов – Челиковиќ, Бојку, Бејтулаи, Тодоровски – Алими, Тотре – Абдурахими (Шефити 82′), Радески (Фазлагиќ 90′), Хасани (Зејнулаи 90’+3′) – Б. Ибраими. Тренер: Ќатип Османи.
Тракаи (формација: 4-3-3): Плукас – Вакили, Климавичиус, Јанушевскис, Боровскиј – Шиленас (Чижас 81′), Воробјовас, Шишка (Мамаев 88′) – Дорли, Бихенок (Јериоменко 46′), Максимов. Тренер: Олег Василенко.