Џанлуиџи Буфон е вистинска фудбалска легенда, сè уште е активен меѓу стативите, се придржува до своите принципи и цени одредени животни вредности. Дел од тоа јасно истакна во интервју за француски „Лекип“, а дел се чита меѓу редови од неговите одговори. Горд е што цели 15 години е член на Јувентус, клуб на кој не му заврте грб ниту во аферата Калчополи поради што „старата дама“ беше исфрлена во Серија Б.
„Верен сум на Јувентус бидејќи ценам одредени животни вредности. Меѓу нив и чувството на припадност. Сите во клубот, вклучувајќи и играчи и навивачи, секогаш се однесуваа коректно кон мене, но и јас кон нив“ истакна Буфон во дел од разговорот за „Лекип“.
Буфон, кој се најде на удар на критичари поради поедини грешки во изминатиот период, пристигна во Јувентус во 2001 година од Парма за рекордни, тогаш, 53 милиони евра. Оттогаш, вели, никогаш немал желба да замине од Торино.
„Се обидувам да не бегам по грешки оти може секому да се случат. Кога направив една, сите одеднаш почнаа да говорат дека сум катастрофа, дека сум стар и слично. Лесно е да ме критикуваат сега кога имам 38 години, но јас правев исти грешки и кога имав 25 или 30 години“, истакна чуварот на мрежата на италијанскиот првак и на репрезентацијата.
Јувентус вечерва (20,45 ч.) ja пречекува Рома во дербито на 17 коло во Серија А. Екипата од Торино е лидер на табелата со 39 бода, четири повеќе од „волчица“, па евентуална победа на римјаните ќе внесе дополнителна неизвесност во борбата за Скудето во оваа сезона. Новта рунда во калчолигата ја отвораат Емполи – Калјари од 15 часот, три часа подоцна Милан е домаќин на Аталанта (18 ч.).