Поради трагичната ситуација во погодените области од невремето, неснаодливоста на државните органи и трагикомичната глетка во која претседател на една партија како во реално шоу ги командува државните функционери за тоа како да се справат со кризата, како што пишува партијата Левица, тие имаат неколку предлог мерки.
Според Левица, треба целосно да се запрат сите проекти од Скопје 2014, а посебно Панорамското тркало и пренамена на средствата за санирање на штетата во погодените места, за помагање на поплавените и за превенирање на вакви штети во иднина.
– Политичката партија ВМРО-ДПМНЕ да ги донира сите пари кои ги има добиено како донација оваа година за помагање на погодените, а лицето Н. Г да ги донира сите заштедени пари од 2015 год. Донирање на половина јулска плата и сите дневници и патни трошоци до крајот на годината од сите 123 народни избраници и од државните функционери за помагање на погодените. Забрана за прес конференции од политичари во погодените области, се дел од мерките кои ги предлага Левица.
Понатаму партијата смета дека треба да се формира еден координативен штаб во кој нема да има ниту еден политичар, туку само стручни лица од сите засегнати институции и претставници од секое погодено место.
Од ЈСП и Македонски железници, Левица бара бесплатен превоз за волонтери од цела Македонија, за работна ација за расчистување на теренот.
– Ангажирање на градежната механизација од сите градежни фирми кои добиле јавни тендери (Бетон, Гранит, Страбаг, Алпине, Трансмет) за расчистување на теренот. Ангажирање на на теренски возила од сите државни институции (ЕЛЕМ, МЕПСО, Македонски шуми, МВР…) за расчистување на штетите и за дистрибуција на помош. Фирмите кои се занимаваат со продажба на станови бесплатно да ги отстапат празните станови за погодените семејства. (Адора, Настел, Голден Арт…), дополнува Левица.
Од сите субвенционирани земјоделски фирми (Пелагонија, Повардарие, Вардар, Агриа…) Левица бара да донираат храна за лицата од погодените области.
Уште една од предложените мерки е секојдневно организирано собирање на непродадената храна на крајот на денот од сите скопски ресторани, кафеани, пекари, сендвичари, супермаркети и нејзино дистрибуирање до погодените а упатуваат повик до стручни фирми и факултети за изработка на студија за санирање на инфраструктурата и изградба на домовите на граѓаните до крај на годината.