Ајнтрахт Ф. успеа да ја елиминира Бенфика и да се пласира во полуфиналето во Лига Европа. По поразот во Лисабон со 2:4, бундеслигашот славеше на домашен терен со 2:0 и се придружи на Челзи, на Валенсија и на Арсенал во големата четворка. Филип Костиќ во 37. минута и Себастијан Роде во 67. минута беа стрелци за тимот од Франкфурт кој во полуфиналето го очекува двомеч со Челзи.
Треба да се напомене дека српскиот интернационалец при постигнување на погодокот беше во офсајд. Но, главниот судија Даниеле Орсато и неговите асистенти не забележаа, а не можеа ниту да ја проверат ситуација од причина што ВАР технологијата нема примена во Лигата Европа.
„Сините“, пак, на „Стемфорд бриџ“ ја добија голеадата со Славија Прага со 4:3 и со вкупни 5:3 продолжуваат во полуфинале. Арсенал и во реваншот го совлада Наполи со 1:0 по триумфот со 2:0 во Лондон додека Валенсија на „Месталја“ го победи Вилјареал со 2:0 (првиот меч го реши во своја корист со 3:1).
Првите полуфинални дуели (Ајнтрахт Франкфурт – Челзи и Арсенал – Валенсија) ќе се одиграат на втори мај, реваншите се седум дена подоцна.
Лига Европа
Четврт-финале, реванши
Челзи – Славија Прага 4:3 (1:0)
Ајнтрахт Франкфурт – Бенфика 2:0 (2:4)
Наполи – Арсенал 0:1 (0:2)
Валенсија – Вилјареал 2:0 (3:1)
Во заграда се резултати од првите средби