Илија Несторовски е на делба на четвртото место на листата на стрелци во Серија А. Денешниот гол против Болоња е седми за репрезентативецот на Македонија во екипата на Палермо колку што досега постигнаа и Гонзало Игуаин, најскапиот играч на Јувентус, и Хозе Каљехон од Наполи.
Калчолигата, моментно, има тројца најдобри стрелци. По десет погодоци имаат Андреа Белоти од Торино, Един Џеко од Рома и Мауро Икарди од Интер. Осамен на втората позиција е Чиро Имобиле од Лацио со 9 гола како и Мохамед Салах од Рома кој има 8.
Несторовски засега има ефект во дебитантската сезона во италијанското првенство каков само можеше да посака. Подобар е од напаѓачи како Карлос Бака од Милан, Марко Бориело од Каљари, Марио Манџукиќ од Јувентус, Никола Калиниќ од Фиорентина, Матија Дестро од Болоња, итн.
Со своите партии и реализации стана „слаба точка“ на сицилијанците, но навлече и внимание од далеку поамбициозните клубови во Серија А што би можело да претставува проблем за Палермо да го задржи на крајот од сезоната.
Со седумте погодоци Несторовски, несомнено, ја подигна сопствената вредност на фудбалскиот пазар меѓутоа Палермо никако да го искористи тоа и да се подигне на табелата.
„Нестогол“ дојде до израз и денеска на гостувањето во Болоња. Стрелаше во деветтата минута за предност на екипата од „Ренцо Барбера“ која на крајот, сепак, беше поразена со 3:1. По 13 одиграни кола, Палермо е втор најлош тим во Италија со шест бода, еден повеќе од Кротоне на последното место.