Според Либералната партија, политичката криза во земјава кулминирала кога Уставниот суд го отвори патот за аболиција на сторители на кривични дела поврзани со изборите и преку распишувањето на изборите и аболицијата од страна на Ѓорге Иванов.
Либералната партија оценува дека кризата ќе се продлабочува и натаму, и дека четирите партии се помалку го водат и контролираат политичкиот процес.
Според ЛП, за најавените преговори во Виена да бидат успешни, потребни се минимум услови а тоа подразбира прекинување на контра-протестите од страна на ВМРО-ДПМНЕ, повлекување на аболицијата од страна на Иванов и одложување на датумот на изборите.
Партијата дополнува дека преговорите во Виена ќе имаат смисла доколку произведат договор на четирите партии за:
- Демисија на Иванов (оставка) или спроведување на постапката на импичмент.
- Формирање концентрациона Влада што ќе спроведе попис на населението.
- Јасна и јавна поддршка на активностите на Специјалното јавно обвинителство.
- Други форми на пацификација на односите меѓу партиите (демисија на лидерите кои ја оневозможија примената на Договорот од Пржино, внесување на други политички и граѓански здруженија во процесот на реализација на обврските, промена на изборниот модел итн.)
Доколку овие предлози не се прифатени како пакет, Либералната партија не гледа смисла за натамошно или било какво учество на преговорите во Виена на претставниците на СДСМ.