Кристијано Роналдо најави спектакуларна вечер за навивачите на Јувентус што и се оствари. Португалецот постигна хет-трик во победата на „старата дама“ над Атлетико Мадрид со 3:0 и ја изведе „старата дама“ на четврт-финале во Лигата на шампиони. Првиот гол го запиша по асистенција на Бернандески во 27. минута, вториот во 48. минута по додавање на Кансело, а точка на двомечот стави во 86. минута од пенал што го изнуди Бернандески. Шпанскиот состав славеше во првиот меч со 2:0 што, сепак, беше недоволно за успешно минување на гостувањето во Торино.
https://www.youtube.com/watch?v=XusdSE2MD7M
Негативата од два што ги донесоа од првиот меч во Мадрид не го поколебаа италијанскиот првак од вербата дека пласманот меѓу осумте најдобри во ЛШ е можен. „Црно-белите“ одиграа одличен меч за разлика од гостите, чие издание беше нетипично и непрепознатливо за нив. Главната улога ја имаше Роналдо кој покажа дека Атлетико Мадрид му лежи како ривал без оглед дали е во дрес на Реал или на Јуве, против тимот од „Ванда Метрополитано“ го постигна 24. гол во кариерата, а реванш осминафиналниот настап го заокружи со осми хет-трик во елитното УЕФА друштво.
Манчестер сити, пак, не покажа нималку милост кон Шалке. По победата во Гелзенкирхен со 3:2 во првата средба, „граѓаните“ во реваншот на „Етихад“ го понижија бундеслигашот со дури 7:0. Двоен стрелец за тимот на Пеп Гвардиола беше Серхио Агеро во 35. минута од пенал и во 38. минута, по еднаш Ралф Фарман го совладаа Лирој Сане во 43. минута, Рахим Стерлинг во 56. минута, Бернардо Силва во 71. минута, Фил Фоден во 78. минута и Габриел Жезус во 84. минута.
https://www.youtube.com/watch?v=oLLliIjAIBQ
Четвртфиналисти во Лигата на шампиони од минатата недела се екипите на Ајакс, на Порто, на Тотенхем и на Манчестер јунајтед, вечерва се придружија Јувентус и Манчестер сити, а последните учесници ќе бидат познати во среда вечер по реваншите меѓу Баерн Минхен – Ливерпул, односно, Барселона – Олимпик Лион. Средбите на „Алијанц арена“ и на „Камп Ноу“ се закажани за 21 часот. Првите мечеви на „Енфилд“ и на „Жерлан“ завршија без голови.
Ждрепката за четвртфиналните двојки ќе се одржи на 15 март (петок) во Нион.
Лига на шампиони, осминафинале, реванши
Јувентус – Атлетико Мадрид 3:0 (0:2)
Манчестер сити – Шалке 7:0 (3:2)
Во заграда се резултати од првите средби.