Јувентус го победи Порто со 2:0, а Севилја беше подобра од Лестер со 2:1 во последните, први, осминафинални средби во Лигата на шампиони. Италијанскиот првак се враќа во Торино со огромни два гола предност по гостувањето на „Драгао“, англискиот, пак, остана во игра за четврт-финале благодарение на погодокот на Џејми Варди на „Рамон Санчез Пискуан“.
„Старата дама“ долго се мачеше во Португалија иако по 27 минута имаше фудбалер повеќе од противникот. Но, головите дојдоа по 50-тина минути од исклучувањето на Алекс Телјес. И тоа во период од само две минути. Миралем Пјаниќ во 72 минута и Алвеш во 74 минута реализираа за тимот на Масимилијано Алегри за мирен реванш на 14 март на „Јуве арена“.
Јувентус доминираше во натпреварот за што говори и поседот на топка од 70 отсто. Упати два удара во рамки на голот и двата завршија зад грбот на Икер Касилјас.
Задоволство, од друга страна, е присутно кај Лестер кој се соочува со испаѓање од Премиерлигата, но затоа осигура нов добар резултат во Лигата на шампиони. Составот на Клаудио Раниери, и покрај бледата форма и реализација во домашното првенство, е во ситуација да брка најмала негатива од сите поразени екипи во осминафиналето. Иако „лисиците“ беа тотално безопасни во Севилја, сепак, на крајот се враќаат дома со добар резултат што дава реални изгледи за пласман меѓу најдобрите осум во елитното натпреварување.
Надежите на Лестер ги задржа Џејми Варди со голот во 73 минута по асистенција на Дринквотер, стрелци за клубот од Андалузија беа Сарабија во 25 минута и Кореа во 62 минута.
Лига на шампиони
Осминафинале, први средби
Порто – Јувентус 0:2
Севилја – Лестер 2:1
Манчестер сити – Монако 5:3
Баер Леверкузен – Атлетико Мадрид 2:4
Баерн Минхен – Арсенал 5:1
Реал Мадрид – Наполи 3:1
ПСЖ – Барселона 4:0
Бенфика – Борусија Дортмунд 1:0