Карло Анчелоти го надмудри Јирген Клоп, Наполи го совлада Ливерпул. Калчолигашот го совлада актуелниот европски првак Ливерпул со 2:0 во мечот од првото коло во групата Е во фудбалската Лига на шампиони. Двата гола на „Сан Паоло“ беа постигнати во второто полувреме. Наполитанците поведоа со голот од пенал на Дрис Мертенс во 82. минута, трите бода ги потврди Фернандо Љоренте во втората минута од судиското надополнување како еден вид на одмазда кон „црвените“ за поразот во финалето во ланското издание на ЛШ како член на Тотенхем.
Македонскиот репрезентативец Елиф Елмас почна како резерва во мечот со Ливерпул и од Анчелоти ги доби последните 20. минути како замена за Алан. Во вториот меч во групата Е, Салцбург како домаќин го совлада Генк со 6:2.
Борусија Дортмунд и Барселона одиграа без голови во второто дерби во вечерта во шампионската лига на УЕФА. Позадоволни од исходот може да бидат Каталонците од причина што „милионерите“ не успеаја да реализираат пенал во 57. минута (Тер Штеген го одбрани ударот на Марко Ројс). Победникот немаше и во вториот меч во групата Ф во кој Интер и Славија Прага одиграа 1:1.
Разочарувачки вовед во новата сезона во Лигата на шампиони за навивачите на Челзи. Валенсија ги порази лондонските „сини“ на „Стемфорд бриџ“ со 1:0 со погодокот на Родриго во 74. минута и навести дека нема да се задоволи со учество во групата Х туку ќе атакува и на пласман во нокаут рундите. Ајакс, во истата конкуренција, во Амстердам го порази Лил со 3:0.
Непријатна вечер пред своите гледачи и за Бенфика. Португалскиот тим загуби на својот стадион „Луж“ од Лајпциг со 1:2 во меч од групата Г во која Олимпик Лион и Зенит Санкт Петербург поделија по бод (1:1) на „Жерлан“.
Лига на шампиони, 1 коло
Група Е: Наполи – Ливерпул 2:0, Салцбург – Генк 6:2
Група Ф: Борусија Дортмунд – Барселона 0:0, Интер – Славија Прага 1:1
Група Г: Бенфика – Лајпциг 1:2, Олимпик Лион – Зенит Санкт Петербург 1:1
Група Х: Челзи – Валенсија 0:1, Ајакс – Лил 3:0