Македонија ќе побара од Европската комисија (ЕК) контрола на корупцијата преку посебен европски механизам за мерење на корупцијата. Механизмот го креираше ЕК за нејзините земји членки.
НОВА дознава дека македонските власти ќе побараат од Комисијата нашата земја да стане дел од тој механизам и методологија за мерење на корупцијата и извештаите што потоа се објавуваат со резултатите од мерењето и европските совети. Според нашиот извор, Македонија не стравува ниту од објективна оценка во оваа област и се надева дека тоа ќе помогне за намалување на корупцијата.
А тоа е неопходно за да може Македонија да го добие зеленото светло не само за старт на преговори за членство и за непречен тек на тие преговори туку и за самиот влез во стратегијата за Балканот што ја најави ЕК за февруари 2019 година.
Во ЕУ Франција застана на чело на битката за борба против корупција. Таа бара од земјите кандидати да покажат сериозни и кредибилни резултати во борбата против корупција за да можат да го добијат францускиот благослов за ЕУ.
– Добро е познато дека Франција е не е многу наклонета кон проширувањето на ЕУ кон Балканот па оттука, за да ја заслужите довербата на оваа земја основач на ЕУ морате вистински да се борите против корупцијата и да покажете резултати, вели извор на НОВА во Брисел.
Со доаѓањето на Емануел Макрон на чело на Франција, оваа земја реши тотално да се ослободи од корупцијата и да стане пример дури и за скандинавските земји. Еден од првите чекори на Макрон беше донесување на закон за доверба во државните институции. Новиот закон, донесен во септември, е строг и бара од сите државни функционери, почнувајќи од самиот претседател, да одговорат на цела низа критериуми за да можат да ја вршат функцијата а исполнувањето на тие барања ќе биде контролирано од посебно независно тело за транспарентност на јавниот живот.
Новата македонска власт се обврза пред граѓаните дека земјата ќе ја води кон ЕУ и оттука ќе побара конкретна помош од ЕУ со барањето за влез во европскиот механизам за мерење на корупцијата.
Првиот Извештај ЕУ за анти-корупција беше објавен во февруари 2014 година и тој дава јасна слика за нивото на корупцијата и борбата против корупција во секоја земја членка. Во тој извештај се наведени мерките и политиките што во една земја се спроведуваат во оваа област како и областите во кои борбата против овој феномен може да се подобри.
Целта на овој механизам е да се креира рамка со која ќе се олесни размената на искуства и знаења помеѓу земјите членки во борбата против корупција и со кој земјата учесник ќе може да се одговори на меѓународните обврски во оваа област.
За ЕУ борбата против корупцијата е еден од највисоките приоритети па Македонија смета дека во својата подготовка за членство во ЕУ мора да ги примени европските стандарди и да се ослободи од огромниот товар на корупцијата што ја осиромашува земјата и ја намалува довербата на граѓаните во демократијата и во институциите.
Со влезот во овој европски механизам Македонија би добивала секоја година детален извештај за сите слаби точки и пропусти во земјата во борбата против корупцијата. Како на пример за конфликтот на интереси, законите против корупција во јавниот и приватниот сектор, ефикасноста на судството во оваа област, одговорноста на политичкиот персонал, финансирањето на политичките партии и, можеби најважното – секторот на јавни набавки особено изложен на злоупотреби.