Кошаркарски пораз рамен на победа, но и кошаркарска игра што предупредува и рамна е на пораз. Македонската репрезентација ја исполни основната мисија, ја мина и втората претквалификациска рунда за Европското првенство во 2021 година и по повеќе од две години пауза се враќа во главна ждрепка за завршен турнир. Романија славеше во Плоешти со 65:53 (по четвртини: 15:16, 19:13, 12:10, 19:14), разлика што на крајот е во прилог на „црвено-жолтите“ за освојување на првото место во групата Б.
Добри во обрана, ужани во напад, беше првиот коментар на селекторот Јорданчо Давитков по натпреварот во Плоешти што остава со помешани чувства. Генерално задоволство од успешното заокружување на севкупната цел и незадоволство од изданието пред претстојните предизвици што ќе бидат поинакви приказни од досегашните што беа насловени како Словачка, Швајцарија, Романија и Косово.
„Мечот беше од исклучително значење за обете селекции, па затоа и играта беше таква каква што беше. Она што одамна беше зацртано, планирано и посакувано го остваривме и се пласиравме во квалификациите. Меѓутоа она што се наметнува како обврска е уште поголема и подобра работа во иднина. Во второто полувреме го променивме начинот на игра во одбрана со што спречивме повеќе поени на Романците“, истакна Давитков.
Дамјан Стојановски со 13 поени беше најефикасен поединец на средбата, неговиот брат Војдан уфрли 12 и тие беа единствени двоцифрени кошаркари во македонската репрезентација во последниот настап во групата Б. По 12 за Романците реализираа Роланд Торок и Емануел Кате, 11 даде Мигел Драгосте, Лукас Тохатан постигна 10.
„Не сум среќен од начинот на кој игравме во Плоешти, но среќен сум од генералниот успех што го остваривме. Две години се мачевме да стигнеме до квалификации во што, конечно, успеавме. Она што следува, сепак, ќе биде различна приказна“, дополни предводникот на националниот тим.
Главната фаза на квалификации за ЕП 2021 почнува во ноември.