Снабдувањето со природен гас во Македонија е обезбедено до 15 април, тврди министерот за економија Крешник Бектеши.
По најавите на Русија дека ќе ја стопира испораката на гас за оние земји кои нема да ја платат сметката во рубља, Бектеши вели оти кај нас нема таква насока од Европската Централна банка имајќи предвид дека на нашата курсна листа рубљата ја нема како валута и не можат да се направат такви трансакции.
„Мерките за снабдување со енергенси се донесени навремено, подготвени сме за секоја можна опција која може да се случи и во делот на електричната енергија и во делот на топлинската енергија не би имале никаков проблем со можна таква одлука на Руската Федерација. Нашиот гасовод оди преку Република Бугарија, во случај да се донесе одлука за стопирање на рускиот гас, сите други алтернативни решенија со кои ќе се снабдува Бугарија, како членка на ЕУ, ќе можеме и ние да ги користиме“, вели министерот.
Осврнувајќи се на петмесечната енергетска и топлинска криза, Бектеши рече дека Владата во соработка со АД ЕСМ успеа да се справи со ценовниот шок наметнат од порастот на цените.
„Успеавме да обезбедиме минимален раст на цената на струјата и парното, а во време кога сите земји во регионот имаат рестрикции на струја, обезбедивме непречено снабдување со електрична енергија за сите домаќинства и мали потрошувачи“, рече министерот за економија Крешник Бектеши и додаде дека 171 милион евра биле префрлени на сметката на „Електрани Македонија“ за набавување на потребните количини на гас, мазут и јаглен.
„Со брзата и навремена реакција, цената на струјата за домаќинствата се зголеми за минимални 9,4 отсто“, рече министерот.
Генералниот директор на АД ЕСМ, Васко Ковачевски во однос на сработеното во изминатите пет месеци истакна дека најмногу пари – околу 72 милиони евра биле исплатени на „ТЕ-ТО“.
„Од оваа сума, 65,9 милиони евра се исплатени за откупената електрична енергија од 300 гигаватчасови, додека 5,87 милиони евра се платени за гас, односно за топлинска енергија за парно-греење. За набавената електрична енергија од странство заради покривање на загубите се исплатени 34,43 милиони евра од 127 гигаватчасови. На операторот МЕПСО за повлечена енергија му се префрлени 12 милиони евра. За набавка на мазут за потребите на ТЕЦ Неготино, термоцентралата која беше стартувана по долги години пауза, се платени 31,72 милиони евра во текот на грејната сезона за 53 илјади тони“, рече Ковачевски и додаде дека со нивното работење биле заштедени околу 30 милиони евра.
Ковачевски најави дека денеска ги завршуваат договорите со ТЕЦ Неготино и АД ТЕ-ТО.
Планот на компанијата за ископ на јаглен за тековната година се 5 милиони тони јаглен за производство на струја за РЕК Битола и помеѓу 150 и 200 илјади тони јаглен за ТЕЦ Осломеј.
(Б.Б.)