Македонија по четврти пати бележи победнички старт на Светските ракометни првенства. Совладан е Тунис во премиерниот меч во Франција со 34:30 (13:14). Кире Лазаров беше најефикасен кај „црвено-жолтите“ со 12 гола (4/4 од линијата за седум метри) и заслужено го понесе признанието играч на натпреварот. По седум во триумфот вградија Дејан Манасков и Стојанче Стоилов колку што запиша и Теџ Исам во тунискиот тим.
Првата цел е дофатена. Остварена е победа во првиот меч што ширум го расчистува патот кон осминафинале. Потребен е уште еден што најреално е да се очекува против Ангола во сабота вечер (20,45 ч.) или евентуално со Исланд во последното коло во групната фаза. Денешната победа е голема, важна, значајна и за самодоверба пред останатите средби во групата. И на крајот доаѓа моментот за подмирување на сметката од Гдањск каде вечерашниот противник го уништи олимпискиот сон.
Македонската репрезентација одигра две различни полувремиња во Мец. Првото го загуби со еден гол, а второто го доби со пет (21:16). Тунис се претстави како што и очекуваше и најавуваше селекторот Лино Червар. Жалуз, Теџ Исам, Банур и голманот Мусауи го одржуваа ривалот во игра во првото полувреме, во второто во еден момент имаше и четири гола разлика (16:20) на што кумуваа и слабите реакции по напади „седум на шест“, трансформација од напад во одбрана, враќање на голман.
Но, минусот не ги скрши „црвено-жолтите“ кои останаа доследни на препораките на Червар да се останат мирни, да не загубат глава, да потиснат емоции и да одиграат со глава – разумно и рационално. Следуваше консолидација, се остана на земја и негативата почна постојано да се топи. По враќање во резултатски чекор се презема иницијатива, се направи пресврт и со серија голови од заостанување за четири гола се поведе со исто толку што и остана актуелна разлика по завршното огласување на сирената „Мец арена“.
Во првиот меч од групата, Словенија ја разби Ангола со 42:25, вечерва (20,45 ч.) ќе играат Шпанија и Исланд.
СП во ракомет
Македонија – Тунис 34:30 (13:14)
Арена во Мец. Гледачи: Судии: Бон-Ок Ко и Сеок Ли (Јужна Јореја)
Македонија: Колев (5 одбрани), Трајковски (3 одбрани), Манасков 7, Стоилов 7, К. Лазаров 12, Митков, Дрогришки, Талески 2, Миркуловски 3, В. Маркоски, Н. Маркоски 1, Георгиевски 2, Ф. Лазаров, Ојлески, Поповски, Нелоски. Селектор: Лино Червар.
Сермерци: 4/4. Исклучувања: 8 минути. Загубени топки: 7
Тунис: Мисауи, Ма. Суси, Туми, Теџ Исам 7, Заед, Банур 5, Хаџ Јусеф, Санаи 1, Буганми 9, Саед 3, Хосни, Т. Жалуз, Шоирев, Мо. Суси, В. Жалуз 5, Жабалах. Селектор: Хафед Зуаби.
Седмерци: 3/4. Исклучувања: 12 минути. Загубени топки: 10