ВМРО-ДПМНЕ останува на барањето за предвремени парламентарни избори, наспроти ставот на власта дека ќе се оди на редовни избори во 2024 година оти соочување со волјата на народот во услови на здравствена, на економска и на енергетска криза се неполезни. Опозициската партија најави и доставување до Собранието на предлог за укинување на техничката влада и ја повика власта да го поддржи заедно со барањето за предвремени избори.
Предложените измени на Законот за Влада од опозициската партија најавуваат дека ќе ги поднесат утре, дека предвидува бришење на околу девет точки од законот, со што практично техничката влада би заминала во историја, но и дека измените одат со барање за предвремени избори.
Најавивме дека ќе поднесеме предлог закон за предвремени парламентарни избори кои по секоја цена ќе се случат, без разлика што си замислуваат во СДСМ. Во тој предлог закон кој што ќе го предложиме, а го најави и претседателот Мицкоски ќе има бришење на околу девет точки кои се однесуваат на техничката влада која што имавме прилика да ја видиме на кој принцип функционираше во изминатите години пред избори. По однос на тоа прашање, последиците кои што ќе произлезат од тој предлог закон ќе бидат враќање на моделот на функционирање на парламентарни избори или предвремени парламентарни избори пред 2016 година, изјави вчера портпаролот на ВМРО-ДПМНЕ, Димче Арсовски.
Портпаролката на СДСМ, Богданка Кузевска, пак, вчера истакна дека ставот на СДСМ околу изборите е јасен и повеќе пати досега искажан – нема време за парламентарни избори во услови на глобални кризи.
Важно е да се напомене дека парламентарното мнозинство е стабилно и тоа се покажа и при изборот на владата и сметаме дека конечно по 15 години една влада треба да го издржи мандатот од четири години, потенцира Кузевска.
Лидерот на ВМРО-ДПМНЕ, Христијан Мицкоски завчера во интервју за ТВ Сител изјави дека според него има десетици причини за предвремени парламентарни избори.
Резултатите на последните локални избори, во првиот и во вториот круг, мерењето на јавното мислење претходно, имаше вест во која јавноста кажува што очекува, повеќе од две третини од граѓаните се за тоа дека треба нова влада, бидејќи оваа ја води Македонија во погрешна насока, рече Мицкоски.
Тој истакна дека досега не разговарал со премиерот Димитар Ковачевски и додаде дека сè уште очекува покана за средба од него. Вели не ја условил таа средба, туку само кажал што очекува, односно, како што рече, дека меѓу другото ќе разговараат и за предвремени парламенатарни избори.
Ковачевки, пак, претходно изјави дека ќе стапи во контакт со лидерот на опозицијата, но напомена дека тој нема да прифати разговор со уцени.
Ќе контактирам со Мицкоски, ќе му се јавам, јас кажав дека под уцени нема да разговараме. Но, јас како премиер морам да разговарам со сите, фокусот сега е на енергетската криза и на сето она што ни се случува во државата. И тоа се надевам ќе го прифати како аргумент и ќе разговараме, изјави премиерот Ковачевски неодамна во интервју за ТВ Канал 5.
Тој повтори дека во услови на здравствена, енергетска и економска криза е целосно неполезно да се бараат избори.
Концептот техничка влада предвидува соработка меѓу власта и опозицијата во периодот до спроведување на изборите, имајќи предвид дека одлуките усогласено треба да ги носат и министерот и заменикот во ресорите, каде и власта и опозицијата имаат свои претставници. Решението за техничка Влада првично беше применето по кризата која настана, откако Зоран Заев како лидер на опозицијата во 2015 година почна со објавување на „бомбите“, по што следеа предвремени избори. Од 2016 година досега Северна Македонија имаше две технички влади, првата предводена од Емил Димитриев, втората од Оливер Спасовски.
Согласно сегашното законско решение техничкиот премиер го предлага партијата на власт, најголемата опозициска партија ги предлага министрите за внатрешни работи и за труд и социјална политика. Власта има свои заменици во МВР и МТСП, додека опозицијата има свои заменици во министерствата за финансии, за информатичко општество и администрација и за земјоделство, шумарство и водостопанство.
Сепак политичките чинители во земјава и од власта и од опозицијата изминативе години го отворија прашањето дали на земјава воопшто и треба ваква влада пред избори, при што преовладува ставот дека треба да се отвори дебата и да се преобмисли ова решение.