Два македонски фудбалски прволигаша со тренерски подновувања во паузата во домашниот шампионат поради репрезентативни настапи. Ден по спогодбениот раскин на договорот со Ѓоре Јовановски, експресно реагираше раководство на Работнички на чија клупа се смести Жикица Тасевски. Двете страни си подадоа рака за соработка до крајот на сезоната со можност за нејзино продолжување во случај на меѓусебно задоволство.

„Се договоривме со Тасевски да ја преземе екипата до крај на првенството. Млад е, амбициозен е, докажан е, поседува интернационално искуство и одлично ги познава прволигашките прилики. Работнички за него е стара и добро позната средина и нашите очекувања се дека ќе успее да го подигне духот на повисоко ниво. Веруваме дека тренерската смена ќе биде дополнителен импулс и за фудбалерите во насока на враќање на позициите што му припаѓаат на клубот“, истакна Драган Поповски, претседател на Работнички.

Жикица Тасевски беше тренер на Работнички во сезоната 2012/13. Претходно работеше во Маџари Солидарност, во Вардар, во Металург, му беше асистент на Александар Станков во стручниот штаб на Локомотив Пловдив и во кинески Хунан Билоус. Негов последен ангажман во домашната сцена бвеше Силекс.

„Гипсарите“ со Никола Илиевски – Џиџи кон Европа

Никола Илиевски-Џиџи по подолга пауза со нова работа во македонската Прва лига. Екс селекторот на Македонија постигна договор со управата на Ренова со чија екипа ќе се обиде да осигура излез на меѓународната сцена во наредното лето. На клупата на „гипсарите“ доаѓа како наследник на Јетон Беќири кој замина од позицијата во изминатиот период. Во вакуум периодот без тренер, тимот го предводеше спортскиот директор Лирим Саити кој успеа да освои седум бода и да се пробие до четвртото место на табелата (победи против Академија Пандев – 0:2 и против Шкупи 2:0 и реми со Шкендија – 2:2).

Илиевски смени доста клубови во менаџерската кариера. Неговото македонско минато е врзано со работа во Работнички, во Куманово, во Саса, во Беласица, во Љуботен, во Рудар Пробиштип, во Скопје, во два наврата во Металург и во Победа, во Вардар. Беше асистент во стручниот штаб на националниот тим во период 1993-1994, самостојно селекторуваше во 2002-2003, а претходно беше на чело и на младата репрезентација.

Меѓународно искуство на клупски план имаше во Целје (1998-2000 година и во сезоната 2005/06), еден период во 2008 година мина на кормилото на романска Валчеа, во сезоната 2010/11 беше на кормилото на албанскиот прволигаш Билис Балш, а во 2015 година и во индонезиски Персијап Јепара. Илиевски во 2011 година беше и селектор на фудбалската репрезентација на Бангладеш.