Интер, Милан, Фиорентина и Лацио во Италија, Севилја и Атлетико Мадрид во Шпанија, Лестер, Тотенхем и Манчестер сити во Англија. Сите тие го посакуваа македонскиот фудбалски бисер, но друг го доби. Елиф Елмас (19) го заменува дресот на Фенербахче со синиот на Наполи. Во тимот на чие кормило е Карло Анчелоти е најавен за утре (среда), најпрво на лекарски прегледи, а потоа и на потпис на петгодишен договор „тежок“, според едни 15 милиони евра, според други 18 милиони евра. Во градот под Везув го гледаат како алтернатива за Фабијано Руиз. Може да одговори на неколку позиции во средниот ред во која најдобар ефект има како централен играч за врска.
Толку пари ќе добие Фенербахче за слободата на македонскиот репрезентативец, процент ќе заврши и во Работнички од каде замина во Истанбул во 2017 година, а на неговата сметка, како што објавуваат медиумите, годишно ќе легнуваат еден милион евра. Турскиот клуб бараше 20 милиони евра за Елмас меѓутоа во последен момент се реши за попуст што како „happy hour“ го искористија наполитанците.
Сметка за кариерата на Елмас водат неговиот татко и менаџерот Никола Ѓошевски, екс фудбалер на Вардар, на Силекс, на Спартак Москва, на Салцбург, на Митјиланд, итн. Неговиот трансфер од Работнички во Фенербахче, пред години, се реализира со помош на познатиот кошаркар Мирсад Јаховиќ, голем удел во овој има Фали Рамадани, кој важи за човек со влијание во италијанскиот фудбалски пазар и веќе има тројца клиенти на „Сао Паоло“ (Србинот Никола Максимовиќ, Хрватот Марко Рог и Сенегалецот Калиду Кулибали). Ова е нивни втор голем трансфер во последните неколку дена по оној на напаѓачот Влатко Стојановски од Ренова во француски Ним за 1,5 милиони евра.
Иако сè уште е тинејџер, сепак, Елиф Елмас веќе има четири сениорски сезони зад себе. Како 15 годишно момче дебитира за првиот тим на Работнички во 2015 година, беше важна алка во младата репрезентација во пласманот на ЕП 2017, а по обврските на турнирот во Полска ја прифати понудата на Фенербахче чии претставници беа најупорни во неговиот ангажман. Во Турција замина за 180.000 евра, а сега во Наполи за 15 до 18 милиони евра (официјалната сума ќе биде позната по официјализирање на договорот).
Елмас е трето засилување за Наполи во летниот преоден рок. Под команда на Анчелоти претходно се согласија и грчкиот стопер од Рома, Костас Манолас и десниот бек на Емполи, Џовани ди Лоренцо. Покрај него, македонскиот фудбал ќе има уште двајца претставници во Серија А во сезоната 2019/20 – Горан Пандев во Џенова и Илија Несторовски во Удинезе.