Европската агенција за азил (ЕАСО) во својот извештај за 2019 година констатира дека за првпат е зголемен бројот на барања за азил во ЕУ, а растот се должи на лица од земји со кои ЕУ го укинала визниот режим.
Лани биле поднесени над 714.000 барања за азил во ЕУ, што претставува зголемување од 13 отсто во споредба со 2018 година, и за прв пат имало повеќе барања отколку за време на бегалската криза во 2015 година.
Но, вели ЕАСО, „зголемувањето не се должи главно на нередовната миграција, туку на апликации од земји кои имаат слободен визен режим со Шенген зоната“.
Најголемиот дел од растот доаѓа од големиот број апликанти на кои не им е потребна виза за влез во Шенген зоната, што објаснува зошто барањата за меѓународна заштита се зголемени, а детектираните нелегални влезови на надворешните граници се намалени. Меѓу нив се наоѓаат лица од Венецуела, Колумбија, Хондурас и Ел Салвадор, но и од западниот Балкан.
Меѓутоа, предупредува ЕАСО, лицата од западен Балкан имаат најмалку шанси да добијат каква било меѓународна заштита или статус на азилант.
Стапката на признавање на азилантски статус во ЕУ е 33 отсто. Најмногу добиваат Сиријците со 85 отсто, Јеменците со 82 отсто и Еритрејците со 81 отсто, додека најниска стапка на одобрување на азил имаат Македонците и Молдавците со еден отсто. Слаба е стапка на признавање и за лицата од Венецуела и Колумбија, меѓу пет и седум отсто.
Македонците се, исто така, меѓу лицата кои најмногу повторно аплицираат откако ќе бидат одбиени: една третина од нив го прави тоа и покрај фактот што имаат најмалку шанси да добијат.