Емануел Макрон сака да смени некои „лоши навики“ на неговите двајца претходници, Никола Саркози и Франсоа Оланд, како на пример, во делот на комуникациите. Ова го нагласи Бенжамен Гриво, портпарол на партијата „Република во движење“ од која доаѓа и новиот претседател на Франција. Најавата меѓудругото се однесува и кон новинарите.
„Обраќањето на претседателот во јавност ќе биде поретко. Верувам дека сите ќе се навикнат на тоа“, рече Гриво кој додаде дека Макрон нема да коментира актуелни дневни вести или да реагира во форма на кратки изјави.
Наследникот на Франсоа Оланд неодамна предизвика незадоволство од неколку француски медиуми. Нивната реакција беше последица директните контакти од Елисејската палата со новинари кои известуваа од неодамнешното гостување на Макрон во Мали. Од таму и пораката дека ќе се бираат новинари за патувањата на францускиот претседател со образложение дека тие треба да бидат стручњаци за земјата во која тој ќе гостува.
Макрон и за време на престојот во Мали ги држел новинарите на одредена дистанца бидејќи од претходно беше најавено оти не сака да дава необврзувачки изјави. За разлика од него, Оланд имаше пракса да разговара со новинарите за време на официјалните посети.