Малта од денеска го презема шестмесечното ротационо претседавање со Советот на ЕУ, а како приоритети за време на својот мандат ги постави прашањата поврзани со миграцијата, безбедноста, единствениот европски пазар, како и соседската политика и поморскиот сектор.
На прашањата за плановите во областа на проширувањето на ЕУ од Претседателство на Малта најавуваат дека ќе ги продолжат активностите почнати од страна на претходниот претседавач, Словачка, јави Танјуг.
– Малтешкото претседавање останува посветено на процесот на проширување. Проширувањето на ЕУ е долготраен процес кој бара силни реформи од земјите-кандидатки, изјави портпаролката на Претседателството на Малта, Венди Борг.
Како апсолутен приоритет на своето претседавање, прво од влегувањето во ЕУ, Малта ги наведува миграцијата, политиката на азил, но и безбедноста на ЕУ, како внатре во Унијата, а така и на нејзините надворешни граници.
Од денеска и Австрија го презеде претседавањето со Организацијата за безбедност и соработка во Европа (ОБСЕ), а со тоа мора да се грижи за безбедноста, демократијата и човековите права од Владивосток до Ванкувер.
Министерот за надворешни работи на Австрија Себастијан Курц во улога на претседавач на ОБСЕ ќе отпатува во вторник во Украина. Тој е планирано да ја посети линијата на фронтот во источна Украина со цел да се запознае со ситуацијата.
– Мораме да сториме се за да се избегне натамошна ескалација на вооружените судири, рече Курц во пораката по повод преземањето на претседавањето со ОБСЕ.
Тој исто така нагласи дека безбедноста на населението во источна Украина мора да биде приоритет.
Во решавањето на украинската криза Курц сака зајакнување на соработката со Москва, бидејќи како што напомена повеќе пати досега, нема мир во Европа без Москва.
Курц конкретно смета дека би требало постепено да се укинуваат санкциите на ЕУ кон Русија за напредок во решавање на украинскиот конфликт. Приоритетите на претседавањето на Австрија ќе ги претстави на седницата на Постојаниот совет на ОБСЕ на 12 јануари.
Австрија, по Германија и Швајцарија е третата земја која по втор пат претседава со ОБСЕ. Прв пат претседаваше во 2000 година.