Здравко Мамиќ е во одлична состојба, надвор е од животна опасност и по укажаната медицинска помош во здравствениот дом во Томиславград, на негово инсистиање, е пуштен на домашно лекување во Загреб, јавуваат хрватските медиуми. Газдата на Динамо утрово беше мета на маскирани напаѓачи кои истрелаа неколку куршуми кон него во местото Зидина во малото гратче во Херцеговина.
Лекарскиот персонал во Томиславград ја санира повредата во пределот на натколеницата и му понуди на Мамиќ да биде превезен во КБЦ Сплит на натамошна опсервација, но тој го одбил таквиот предлог и побарал да се врати во хрватската престолнина што му било и овозможено.
Напаѓачите го напуштиле местото на настанот и со автомобил се упатиле во непознат правец. Томиславград е на нозе и под полициска опсада и во потрагата по сторителите на инцидентот се вклучени и полицискките управи од Ливно и Посушје.
Порталот „24сата.хр“ објави и фотографии на Здравко Мамиќ со роднини и вработени во здравствениот дом во Томиславград на кои човекот што важи за алфа и омега во хрватскиот фудбал е со насмеано лице.
Неофицијално, драмата во Томиславград се случи пред градската капела додека Мамиќ, во прудружба на 40-тина роднини и пријатели, излегувал по одбележување на годишнина од смртта на неговиот татко. Извор близок до семејство го окарактеризира нападот како класична заседа, а очевидци истакнаа дека биле истрелани неколку куршуми од кои само еден завршил во него што подоцна е утврдено дека не погодил коска.