Она што беше Дејан Манасков за македонската ракометна репрезентација во Рејкјавик, тоа беше Елвар Орн Јонсон за исландската во Скопје. Левото крило на унгарски Телеком Веспрем погоди за триумф (34:33) на „црвено-жолтите“ во првиот меч, средниот бек, пак, на Селфос реализира за реми (24:24) на Исланѓаните во реваншот.
Конечниот исход во двата меча се решаваше во самата завршница. Позадоволни, сепак, може да бидат македонските ракометари кои впишаа три од можните четири бода во мечевите со директниот ривал за првото место во третата квалификациска група за пласман на ЕП 2020 и во двата последни настапа ќе влезат како лидери на табелата, но и како фаворити во повторните соочувања со Турција на гости и со Грција на домашен терен.
„Победата ја имавме на дофат. Имавме и водство и напад за нејзин печат, но погрешивме и ја испуштивме. Жалиме што вака заврши натпреварот, но ако некој ни понудеше три бода пред двомечот со Исланд, ќе прифатевме без размислување. Вака излегува дека на подарената победа во Рејкјавик, ние возвративме со реми во Скопје“, коментира Дејан Манасков, стрелец на четири гола во реваншот со Исланд.
Завршницата на циклусот за ЕП 2020 е по два месеца. Македонските ракометари на 12 јуни ќе гостуваат на Турција, а четири дена подоцна ќе бидат домаќини на Грција.