Енди Мареј признава дека направил исчекор кон врвот на АТП листата по денешниот триумф на турнирот Виена меѓутоа и натаму смета дека е далеку од Новак Ѓоковиќ. Шкотланѓанцот во финалето го совлада 15 светски рекет, Жо Вилфред Цонга со 6:3, 7:6 за втора титула во австриската престолнина во вториот настап по 2014 година.
„Со секоја победа сум се поблиску. Сепак ме чека долг пат. Изгледа дека чекорот од второто до првото место е мал, но е најтежок. Многу е полесно да е пробиете од 100 позиција меѓу првите 5о“, нагласи Мареј.
Победата во Виена е негова седма турнирска во сезоната, колку што има и Ѓоковиќ, или 42 во кариерата. Мареј би можел до првото место уште по Мастерсот во Париз што почнува утре доколку успее и да го освои, а српскиот тенисер да загуби во било која фаза на турнирот.
„Во мислите ми беше како да победам, а не што ќе значи таа победа. Убаво е чувството по седмата титула. И не само по оваа. Многу титули дојдоа во последните неколку месеци. Имав проблеми по Австралија, малку се мачев. Од мај наваму е навистина добро. Не можам да се пожалам“, додаде Мареј по Виена и продолжение на низата од 14 меча без пораз.
И во право е британскиот тенисер кога вели дека шесте месеци се навистина добри за него. Со голема самодоверба ги дочекува турнирите што особено важи по финалето на Ролан Гарос. По францускиот гренслем го „покори“ Вимблдон, освои злато на Игрите во Рио де Жанеиро и трофеи на Мастерсите од серијата 1000 во Рим и Шангај и на турнирите од серијата 500 во Квинс, Пекинг и Виена.